މާލެ ސަރަހައްދުގެ ފެނުގެ ޚިދުމަތް އިތުރަށް ހަރުދަނާކޮށް، ފެނުގެ ރައްކާތެރިކަން ކަށަވަރުކުރުމަށް އެމްޑަބްލިޔުއެސްސީން ކުރިއަށްގެންދާ މުހިންމު މަޝްރޫޢުގެ ދަށުން، ހުޅުމާލޭގައި އަލަށް ބަހައްޓާ 5000 ޓަނުގެ ފެން ޕްލާންޓުގެ މަސައްކަތް ނިންމައި އަންނަ މަހު ޚިދުމަތް ދޭން ފެށޭނެކަމަށް އެ ކުންފުނިން ބުނެފިއެވެ
ޕީއެސްއެސްއަށް ދެއްވި އިންޓަވިއުއެއްގައި އެމްޑަބްލިޔުއެސްސީގެ މެނޭޖިން ޑިރެކްޓަރު އަބްދުލް މަތީން މުހައްމަދު ވިދާޅުވީ، ކުންފުނީގެ އެންމެ ބޮޑު އަމާޒަކީ ރައްޔިތުންނަށް މެދުކެނޑުމެއްނެތި ފެން ފޯރުކޮށްދިނުމުގެ ޔަގީންކަން ދެމެހެއްޓުން ކަމަށެވެ.
މަތީން ވިދާޅުވީ، ފާއިތުވި އަހަރުގެ ތެރޭގައިވެސް 5000 ޓަނުގެ ފެން އުފައްދާ ޕްލާންޓެއްގެ މަސައްކަތް ނިންމައި މިހާރު ބޭނުންކުރަމުންދާ ކަމަށެވެ. އަދި ހުޅުމާލޭގައި މިހާރު ކުރިއަށްދާ އިތުރު 5000 ޓަނުގެ ނިޒާމުގެ މަސައްކަތްވެސް މަހެއްހާ ދުވަހުގެ ތެރޭގައި ނިންމާލެވޭނެ ކަމަށް ވިދާޅުވިއެވެ.
މި އާ ނިޒާމު ވުޖޫދަށް އައުމާއެކު، ފެން އުފެއްދުމުގެ ޤާބިލުކަމަށް ޖުމްލަ 10،000 ޓަނުގެ އިތުރުވުމެއް އަންނާނެ ކަމަށް އޭނާ ވިދާޅުވިއެވެ.
މިއީ ހުޅުމާލޭގައި އަލަށް ހުޅުވޭ ފްލެޓްތަކާއި ސްކޫލްތަކުގެ ސަބަބުންނާއި، އަދި ކުރިއަށް އޮތް ރޯދަ މަހާ ދިމާކޮށް ފެނުގެ ޑިމާންޑް އިތުރުވާނެތީ، އެއްވެސް ދަތިކަމެއް ނެތި އެކަށީގެންވާ ގޮތެއްގައި ޚިދުމަތް ފޯރުކޮށްދިނުމަށް އެޅިގެންދާ ވަރަށް މުހިންމު ފިޔަވަޅެކެވެ.