މާލެ ސަރަހައްދުގައި ސިއްހަތަށް ނުރައްކާވާ މިންވަރަށް ވައި ނުސާފުވެ، ރެޑް އެލާޓް ނެރެފިއެވެ.
ވިލިމާލޭގައި ހުންނަ ސެންޓަ ފޯ މެރިޓައިމް ސްޑަޓީޒްގައި ގާއިމްކޮށްފައިވާ އެއާ ކޮލެޓީ މޮނީޓާ ސިސްޓަމުން ދައްކާގޮތުން މި ސަރަހައްދުގައި ވައިގެ ކޮލެޓީ ހުރީ 175 ގައެވެ. މިއީ ރަތް އެލާޓު ނުވަތަ ސިއްހަތަށް ނުރައްކާ ވާ މިންވަރެކެވެ.
އެހެންކަމުން މިކަމަށް ހާއްސަ ސަމާލުކަމެއް ދިނުމަށް މޫސުމާ ބެހޭ ގައުމީ އިދާރާ އިން ވަނީ އިލްތިމާސްކޮށްފައެވެ.
މި ހާލަތަށް ދިޔުމުން އެންމެ ބުއްދިވެރިގޮތަކީ ކޮންމެހެން ނުކުންނަންޖެހިގެން ނޫނީ ބޭރަށް ނުނުކުތުމެވެ. ބޭރަށް ނުކުންނައިރު ވެސް މާކްސް އެޅުމަކީ މުހިންމު ކަމެކެވެ. އަދި ގޭގެ ކުޑަދޮރުތައް ލައްޕާފައި ބެހެއްޓުމަށް ވެސް ހާއްސަ ސަމާލުކަމެއް ދޭންޖެހެއެވެ.
މި ހާލަތުގެ ސަބަބުން ސިއްހީ ގޮތުން ނޭދެވޭ އަސަރުކޮށް ފުއްޕާމެއާއި ހިތުގެ ބަލިތައް ބޮޑުވުމުގެ ނުރައްކާ އެންމެންނަށް ވެސް އޮންނާނެ ކަމަށް އެޗްޕީއޭ އިން ބުންޏެވެ.
ކޮންމެ އަހަރެއްގެ ވެސް އިރުވައި މޫސުމާ އެކު، ވައިގެ މިސްރާބަށް ބަދަލު އައިސް، ހިމާލިޔާ ސަރަހައްދުގެ ހިރަފުހާއި ދުމުގެ އަސަރު ރާއްޖެއަށް ކުރެއެވެ.