ރ. އުނގޫފާރާއި ދުވާފަރު އާބަން ސެންޓަރެއްގެ ގޮތުގައި ތަރައްގީކުރަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މަސްވެރިންގެ ދުވަސް ފާހަގަކުރުމަށް ރޭ ދުވާފަރުގައި ބޭއްވި ރަސްމީ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ އުނގޫފާރާއި ދުވާފަރުގައި އާބަން ސެންޓަރު ތަރައްގީ ކުރާނީ ދެމެހެެއްޓެނިވިގޮތެއްގައި މެދު އަދި ދުރުރާސްތާގައި ތަރައްގީގެ މުހިންމު ނާރެހެއްގެ ގޮތުގައި ކަމަށެވެ.
އެކަމަށް މަގުފަހިކުރުމަށްޓަކައި އަންނަ ރޯދަ މަސް ފެށުމުގެ ކުރިން އެ ދެ ރަށް ދެމެދުގައި އާރްޓީއެލް ފެރީގެ ޚިދުމަތް ފަށާނެ ކަމަށް އެމަނިކުފާނު ވިދާޅުވިއެވެ.
”މި ދެ ރަށް ދޭތެރޭގައި އެކަނި ޑެޑިކޭޓް ކުރެވިފައިވާ އާރްޓީއެލް ފެރީއެއް އަޅުގަނޑުމެން ގާއިމު ކުރާނަން،“ ރައީސް ވިދާޅުވިއެވެ.
ރައީސް ވިދާޅުވީ މުޅި ރާއްޖޭގެ ތަރައްގީ ވިޔަސް އެއްވެސް ރަށެއްގައި ނުފުއްދޭނެ ވައުދެއް އެމަނިކުފާނު ވެވަޑައިގެންފައިނުވާނެ ކަމަށެވެ.
”އަޅުގަނޑުވާ ކޮންމެ ވައުދެއް ފުއްދަން ވެގެން މަސައްކަތްތައް ފަށަނީ، އެކަން ހަގީގީ މާނައިގަ ކުރެވޭގޮތް ތަރުތީބުކޮށްފައި، ނަމެއްގައި ނުކުރަން. ނުވެސް ފަށާނަން. އެއީ އަޅުގަނޑު ކަންކުރާނެ ގޮތެއް ނޫން. މި ސަރުކާރުން ކަން ކުރާނެ ގޮތެއް ނޫން. މިރަށުގެ ތަރައްގީއަށްޓަކައި ވެސް ކުރަންހުރި ހުރިހާ ކަމެއް އަޅުގަނޑުމެން މި ފަށައިގަތީ އެގޮތަށް ކަންކަން ތަރުތީބުކޮށްފައި،“ ރައީސް ވިދާޅުވިއެވެ.
ޖުމްލަ 15 މަޝްރޫއާ ގުޅޭކަންކަން އިއްޔެ ދުވާފަރުގައި އެކި މަރުހަލާތަކުގައި ފެށިގެން ކުރިއަށްދިޔައިރު، އެއީ މިހާތަނަށް އެއް ދުވަހެއްގައި އެއް ރަށެއްގައި ހިންގުނު އެންމެ ގިނަ ތަރައްގީގެ މަޝްރޫއު ކަމަށް އެމަނިކުފާނު ވިދާޅުވިއެވެ.
”މިދިޔަ ދުވަސްތަކުގައި ދުވާފަރު ތަރައްގީއަށް ކަމެއް ނުވެ އޮތުމަކީ އަޅުގަނޑު އެކަމުގެ ވާހަކަ ދައްކަންޖެހޭ ސަބަބެއް ނޫން،“ ރައީސް ވިދާޅުވިއެވެ.
ދުވާފަރަކީ 5000 މީހުންގެ އާބާދީއެއް އޮތް ރަށަކަށްވާއިރު، އެރަށުގެ އާބާދީއާ ގާތްކުރާ ވަރަށް ވެސް އެ ރަށުގައި މިހާތަނަށް ސިއްހީ ޚިދުމަތް ގާއިމްވެފައިނުވާ ކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވީ ތިއޭޓާގެ ޚިދުމަތާއި އެކި ކަހަލަ ޚިދުމަތްތައް ހިމެނޭ އާ އިމާރާތާއެކު ދުވާފަރު ސިއްހީ މަރުކަޒު ހޮސްޕިޓަލަކަށް ބަދަލުކޮށް އެރަށުގެ ސިއްހީ ޚިދުމަތް އެހެން ހަރުފަތަކަށް ގެންގޮސްދޭނެ ކަމަށެވެ.
ދުވާފަރުގެ ބިންހިއްކުމުގެ މަސައްކަތަކީ އެރަށުގެ ތަރައްގީއާ ގުޅިފައިވާ މުހިންމު މަޝްރޫއެއްކަން ފާހަގަކުރައްވައި ރައީސް ވިދާޅުވީ 15 ހެކްޓަރުގެ ބިން ހިއްކުމުގެ މަސައްކަތް މިހާރު ފެށިފައިވިޔަސް އެ މަޝްރޫއު ނިމޭއިރު، ޖުމްލަ 30 ހެކްޓަރުގެ ބިން ހިއްކައި މިހާރު ހިއްކައި ނިމިފައިވާ ބިމާ ގުޅުވާލެވޭނެ ކަމަށެވެ.
”ދުވާފަރުގައި ބިން ހިއްކެން އޮތް އެންމެ ބޮޑަށް އަޅުގަނޑުމެން ބިން ހިއްކައި ނިންމާނަން،“ ރައީސް ވިދާޅުވިއެވެ.