ރ. ދުވާފަރުގެ ތަރައްގީގެ ޗާޓް ރައީސް ޑރ. މުހައްމަދު މުއިއްޒުގެ ސަރުކާރުން އަލުން ކުރަހާލާނެ ކަމަށް ދުވާފަރު ދާއިރާގެ މަޖިލިސް މެންބަރު މުހައްމަދު އަލީ ވަނީ ދާދިފަހުން ވިދާޅުވެފައެވެ. މެންބަރު މުހައްމަދު އަލީ އެހެން ވިދާޅުވިޔަސް ބައެއް ފަރާތްތަކުން އެ ވާހަކަ ގަބޫލެއް ނުކުރިއެވެ. ބައެއް ފަރާތްތަކުން ބުނަމުން ދިޔައީ އެއީ ރައްޔިތުންގެ ލޮލުގައި އަދުންއެޅުވުމަށް ދެއްކެވި ތޯތޯ ވާހަކަތަކެއް ކަމަށެވެ.
ނަމަވެސް ރައީސް މުއިއްޒު މިއަދު ދުވާފަރަށް ވަޑައިގަތުމާއެކު ދުވާފަރުގެ ތަރައްގީގެ ޗާޓް މިހާރު މިވަނީ އަލުން ކުރަހާލެވިފައެވެ. ދުވާފަރަށް މިއަދު އައީ ތަރައްގީގެ އީދެކެވެ. މިއީ ދުވާފަރު ރައްޔިތުން ދުވަހަކުވެސް ހީކުރި ކަމެއް ނޫނެވެ. އެއްވެސް ސަރުކާރަކުން އެއްފަހަރާ މިހާ ގިނަ ތަރައްގީގެ މަޝްރޫއުތައް ފަށާފާނެ ކަމަށް ގަބޫލެއް ނުކުރެވުނެވެ.
ދުވާފަރު ދާއިރާގެ މެންބަރު ދާދިފަހުން ދެއްވި ޔަގީންކަމާއެއްގޮތަށް ރަނުން ރަނަށް މި ސަރުކާރުން ވައުދު ފުއްދަައިފިކަން ދުވާފަރު ރައްޔިތުން މިއަދު ގަބޫލުކޮށްފިއެވެ.
ދުވާފަރުގައި މިއަދު ތަރައްގީގެ މަޝްރޫއުތަކުގެ އަމަލީ މަސައްކަތް ފެށީ އެކަންޏެއް ނޫނެވެ. ބައެއް މަޝްރޫއުތައް ނިންމައި ވަނީ ހުޅުވާފައެވެ.
އެގޮތުން ފުރަތަމަ ފަހަރަށް މޯލްޑިވްސް އިސްލާމިކް ބޭންކުގެ އޭޓީއެމްއެއް އެރަށުގައި މިއަދު ވަނީ ހުޅުވައި ޚިދުމަތްދޭން ފަށާފައެވެ. އެސްޓީއޯ ރޭޓްގައި މަސްވެރިންނަށް ތެޔޮ ވިއްކަން ފެށި ފުރަތަމަ ރަށަކީ ދުވާފަރަށް މިވަނީވެފަ އެވެ. ރައީސް މުއިއްޒުގެ ވައުދާއެއްގޮތަށް ދައުވާފަރުގައި ވަނީ ފިއުލް ސަޕްލައި މޯލްޑިވްސްގެ ފިއުލް ޝެޑެއް ހުޅުވާފައެވެ. އެއީ އެސްޓީއޯގެ ދަށުން ހިންގަމުން އަންނަ ކުންފުންޏެކެވެ. މިއަދުން ފެށިގެން އެ ޝެޑުން އުތުރުގެ މަސްވެރިންނަށް އެސްޓީއޯ ރޭޓްގައި ތެޔޮ ލިބޭނެއެވެ.
ދުވާފަރުގެ ސްކޫލް ކުދިންނަށް އެތަކެއް ފަސޭހަތަކެއް ލިއްބައިދޭ އާރުޓީއެލް ބަހުގެ ޚިދުމަތް ރައީސް މުއިއްޒު މިއަދު ވަނީ ފައްޓަވައިދެއްވާފައެވެ.
ދުވާފަރު ސިއްހީ މަރުކަޒު ތަރައްގީކޮށް ރަސްމީކޮށް ވަނީ ހުޅުވާފައެވެ. އެވަރުން ނިންމާލީއެއް ނޫނެވެ. އެ ސިއްހީ މަރުކަޒު ހޮސްޕިޓަލަކަށް ބަދަލުކުރުމަށް ބޭނުންވާ އާ އިމާރާތުގެ އަމަލީ މަސައްކަތް ވެސް ވަނީ ފަށާފައެވެ.
މިއަދު އަމަލީ މަސައްކަތް ފެށި މަޝްރޫއުތަކުގެ ތެރޭގައި އެރަށު ބަނދަރު ބޮޑުކުރުމުގެ މަސައްކަތާއި ފުލުހުންގެ މަރުކަޒެއް ގާއިމްކުރުމުގެ މަސައްކަތާއި އިއާދަކުރަނިވި ހަކަތައިގެ މަޝްރޫއެއް އިފްތިތާހުކުރުން ހިމެނެއެވެ. މީގެއިތުރުން އައުޓްޑޯ ވޮލީ ކޯޓުގެ މަސައްކަތާއި ދަނާލުގެ މަސައްކަތާއި ވޭސްޓް މެނޭޖްމަންޓް ސެންޓަރާއި ބިން ހިއްކުމުގެ ދެވަނަ ފޭސްގެ މަސައްކަތް ވެސް މިއަދު ވަނީ ފަށާފައެވެ.
މީގެއިތުރުން ދުވާފަރު ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ގެނައުމަށް އެ ރަށުގައި 50 ހައުސިން ޔުނިޓް އެޅުމުގެ މަސައްކަތް މިއަދު ވަނީ އެޗްޑީސީއާ ހަވާލުކޮށްފައެވެ.
އެރަށުގައި ހިއްކި ބިމަށް ބޭނުންވާ ފެނާއި ނަރުދަމާ ގާއިމުކުރުމަށް އެމްޑަބްލިޔުއެސްސީއާ ވަނީ ހަވާލުކޮށްފައެވެ. އަދި ސްޕޯޓްސް ކޮމްޕްލެކްސްއެއް ގާއިމްކުރުމުގެ މަސައްކަތް އެމްއޭސީއެލްއާ ވަނީ ހަވާލުކޮށްފައެވެ.