ރ. އަތޮޅުގެ އެންމެ އާބާދީބޮޑު ރަށް ކަމަށްވާ ދުވާފަރުގެ ތަރައްގީގެ ޗާޓް ރައީސް ޑރ. މުހައްމަދު މުއިއްޒު ބަދަލުކޮށްލައްވާނެ ކަމަށް ރައްޔިތުންގެ މަޖިލީހުގެ ދުވާފަރު ދާއިރާގެ މެންބަރު މުހައްމަދު އަލީ ވިދާޅުވެއްޖެއެވެ.
ދުވާފަރު ސިއްހީ މަރުކަޒު ހޮސްޕިޓަލެއްގެ ފެންވަރަށް ތަރައްގީކުރުމަށް މިއަދު ވަނީ އަމިއްލަ ކުންފުންޏަކާ ހަވާލުކޮށްފައެވެ. އެ ރަސްމިއްޔާތަށްފަހު މެންބަރު މުހައްމަދު އަލީ ވިދާޅުވީ އެ ހަވާލުކުރެވުނީ ދުވާފަރުގެ ތަރައްގީގެ ކުޑަ މިންވަރެއް ކަމަށެވެ.
”ރައީސް މުއިއްޒުގެ ވައުދާއެއްގޮތަށް ދުވާފަރު ސިއްހީ މަރުކަޒު ހޮސްޕިޓަލެއްގެ ފެންވަރަށް ތަރައްގީކުރަން މިއަދު ހަވާލުކުރެވުނީ. މިއީ އަދި ދުވާފަރަށް އެމަނިކުފާނު ގެންނަވަން ނިންމަވާފައިވާ ތަރައްގީގެ ކުޑަމިންވަރެއް،“ މުހައްމަދު އަލީ ވިދާޅުވިއެވެ.
މުހައްމަދު އަލީ ވިދާޅުވީ ދުވާފަރު ސިއްހީ މަރުކަޒުގެ ނަންބޯޑު ހޮސްޕިޓަލަކަށް ބަދަލުކޮށްލުމަކީ ރައީސް މުއިއްޒަށް ވަރަށް ފަސޭހަކަމެއް ކަމަށެވެ. ނަމަވެސް އެއީ އެމަނިކުނާފު ބޭނުންފުޅުވާގޮތެއް ނޫން ކަމަށާއި ހޮސްޕިޓަލެއްގައި ހުންނާނެ ފުރިހަމަ ފެސިލިޓީއާއެކު ތަރައްގީކުރެވި ދުވާފަރު ހޮސްޕިޓަލް ރައްޔިތުންނާ ހަމައަށް ރައީސް ގެނެސްދެއްވާނެ ކަމަށް މެންބަރު ވިދާޅުވިއެވެ.
މި ސަރުކާރުން މިހާރު ވެސް އަންނަނީ ދުވާފަރުގައި ތަރައްގީގެ ގިނަ މަޝްރޫއުތަކެއް ހިންގަމުންނެވެ. އޭގެތެރޭގައި ރީޖިނަލް ޕޮލިސް ސްޓޭޝަން އިމާރާތްކުރުމާއި ޕްރައިމަރީ ސްކޫލްގެ އާ ކްލާސް ރޫމްތައް އެޅުމާއި އެފްއެސްއެމްގެ ޕެޓްރޯލް ޝެޑެއް އެޅުމާއި ޔުނިވާސިޓީގެ ދަނާލް ގާއިމް ކުރުމުގެ މަސައްކަތް ހިމެނެއެވެ.
މީގެއިތުރުން ހިއްކި ބިމުގައި ހައުސިން ޔުނިޓްތައް އެޅުމުގެ މަސައްކަތް ވެސް ވަނީ ހަވާލުކުރެވިފައެވެ.
ދާދިފަހުން ދުވާފަރުގައި ބީއެމްއެލްގެ ބްރާންޗެއް ވެސް ވަނީ ހުޅުވާފައެވެ. އަދި އެ ރަށުގައި ވަނީ އިސްލާމިކް ބޭންކުގެ އޭޓީއެމްއެއްގެ ޚިދުމަތް ވެސް ވަނީ ފަށާފައެވެ.
ދުވާފަރު ދާއިރާގެ މެންބަރު މުހައްމަދު އަލީ ވިދާޅުވީ އެވަރުން ނުނިމޭ ކަމަށާއި ދުވާފަރު ރައްޔިތުންނަށް ކުރިއަށް އޮތީ އުފާވެރި ދުވަސްތަކެއް ކަމަށެވެ.
”ކުރުކޮށް ދަންނަވަންޏާ ދުވާފަރު ރައްޔިތުންނަށް ކުރިއަށް އޮތީ އުފާވެރި ދުވަސްތަކެއް. މި އުފާވެރިކަން މި ޒައާމަތުގައި ދުވާފަރު ރައްޔިތުންނަށް ލިބިގެންދާނެ. ދުވާފަރުގެ ތަރައްގީގެ ޗާޓް ރައީސް ބަދަލުކޮށްލައްވާނެ،“ މެންބަރު މުހައްމަދު އަލީ ވިދާޅުވިއެވެ.