ފަލަސްތީނުގެ ގާޒާއަށް ދެމުންދާ ހަމަލާތައް ވަގުތީ ގޮތުން ހުއްޓާލެވިދާނެ ކަމަށާއި ނަމަވެސް ގާޒާ ހިފާނެ ކަމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ބުނެފިއެވެ.
އިޒްރޭލު ސިފައިން ގާޒާއަށް އެއްގަމުން މަގުން އަރައި ވަރުގަދަ އޮޕަރޭޝަނެއް ފަށާފައިވާއިރު، ނަތަންޔާހޫ އިއްޔެ ބުނީ ވަގުތީ ގޮތުން ހަމަލާތައް މެދުކަނޑާލައި، ރަހީނުން މިނިވަންކުރާނެ ގޮތެއް އޮތް ނަމަ އިޒްރޭލުން އެކަމަށް އިޖާބަދޭނެ ކަމަށެވެ. ހަމާސް ބަލިކޮށް މުޅި ގާޒާ އިޒްރޭލުގެ ބާރުގެ ދަށަށް ގެންނާނެ ކަމަށް ނަތަންޔާހޫ ބުންޏެވެ.
އިޒްރޭލުން ފަށާފައިވާ އޮޕަރޭޝަނުގެ ސަބަބުން ފާއިތުވި ފަސް ދުވަސްތެރޭ ގާޒާއިން ގާތްގަނޑަކަށް 400 އަށް ވުރެ ގިނަ މީހުން ވަނީ މަރުވެފަ އެވެ. މި އޮޕަރޭޝަން ހުއްޓާލައި ގާޒާއަށް އިންސާނީ އެހީތެރިކަން ވައްދަން އަޅާފައިވާ ހުރަސްތައް ނައްތާލަން ގައުމުތަކުން އަންނަނީ އިޒްރޭލަށް ގޮވާލަމުންނެވެ.
އިޒްރޭލުން އަންނަނީ އާންމުން ދިރިއުޅޭ ތަންތަނުގެ އިތުރުން ގާޒާގެ މިސްކިތްތަކާއި ސިއްހީ ހިދުމަތްދޭ ތަންތަނަށް ވެސް ހަމަލާތައް އަމާޒުކުރަމުންނެވެ.
އިޒްރޭލުން ދެމުންދާ ހަމަލާތަކުގައި މިހާތަނަށް ގާޒާ އިން 53،000 އަށް ވުރެ ގިނަ މީހުން މަރުވެފައިވާއިރު، 100،000 އަށް ވުރެ ގިނަ މީހުންނަށް އެކި ވަރުގެ އަނިޔާތައް ވަނީ ލިބިފަ އެވެ. މި ހަމަލާތަކުގެ ސަބަބުން ގާޒާގެ 85 ޕަސެންޓު މީހުން ގެދޮރު ދޫކޮށް ގޮސްފައިވާއިރު، ގާޒާގެ ބައި މިލިއަނެއްހާ މީހުން ބަޑުހައިހޫނުކަން އަންނަނީ ތަހައްމަލު ކުރަމުންނެވެ.