އިންޑިޔާ އާއި ޕާކިސްތާނުގެ ބޯޑަރު ސަރަޙައްދުގައި އަނެއްކާވެސް ހަނގުރާމައިގެ ޙާލަތު ގޯސްވެ ވަރުގަދަ ހަމަލާތަކެއް ބަދަލުކޮށްފިއެވެ.
މިހަމަލާތަކުގެ ތަފްޞީލު އަދި މީޑިއާތަކަށް ތިލަވެފައި ނުވާއިރު، މީހަކު މަރުވިކަމުގެ މައުލޫމާތު އަދި ނުލިބެއެވެ.
އިއްޔެ ރޭވެސް ޖައްމޫ، އަމްރިތްސަރު އަދި އެހެނިހެން ސަރަޙައްދުތަކުގައި ގޮވުންތަކާއި އަލިފާންގަނޑުތައް ފެނިފައިވާ ކަމަށް ރިޕޯޓުތައް ބުނެއެވެ.
އިންޑިޔާގެ ސިފައިންގެ ބަޔާނެއްގައި ބުނެފައިވަނީ ޕާކިސްތާނުން ފޮނުވި ޑްރްރޯންތަކެއް އޭގެ އަމާޒަށް ވާސިލްވިޔަ ނުދީ ހުއްޓުވާލެވުނު ކަމަށެވެ. ނަމަވެސް، ޕާކިސްތާނުގެ ބެލުމުގެ ދަށުގައިވާ ކަޝްމީރު ސަރަޙައްދުގެ އިސްވެރިން ބުނެފައިވަނީ އިންޑިޔާގެ ހަމަލާތަކުގައި އެ ސަރަޙައްދުގެ 5 އާންމު ރައްޔިތުން މަރުވެފައިވާ ކަމަށެވެ.
މި ހާދިސާތައް ހިނގާފައިވަނީ ދެ ޤައުމުގެ ދެމެދުގައި އޮތް ކޮންޓްރޯލް ލައިން ކައިރީގައެވެ. މިއީ ފާއިތުވި އަހަރުތަކުގައި ދެ ޤައުމުގެ ދެމެދުގައި ހިނގަމުން އައި އެންމެ ބޮޑު ހަނގުރާމައިގެ ޙާލަތު ކަމަށް ރިޕޯޓްތަކުގައި ބުނެފައިވެއެވެ.
އދ. އިން ދެ ޤައުމަށް ގޮވާލާފައި ވަނީ، ވަގުތުން ހަނގުރާމައިގެ ޙާލަތު ހުއްޓާލުމަށާއި، ހަމަޖެހުމާއެކު ވާހަކަ ދައްކައިގެން މައްސަލަ ޙައްލުކުރުމަށް މަސައްކަތްކުރުމަށެވެ. އަދި ބައިނަލްއަޤްވާމީ މުޖުތަމަޢުން ވެސް ވަނީ މި ކަމާ ކަންބޮޑުވުން ފާޅުކޮށްފައެވެ.