އައްޑޫ ސިޓީއަށް ދިމާވެފައިވާ ކަރަންޓްގެ މައްސަލައަށް ދާއިމީ ހައްލެއް ގެނައުމަށް މިއަދު ހަވީރު ބަޔަކާ ހަވާލުކޮށްފައިވާއިރު، ކުރިއަށް އޮތް 20 އަހަރަށް އައްޑޫގެ ކަރަންޓްގެ މައްސަލަ ހައްލުވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ދަ ގްރޭޓާ އައްޑޫގެ އިވެންޓްގައި ވާހަކަފުޅުދައްކަވަމުން ރައީސް ވިދާޅުވީ މިއަދު ސޮއިކުރި އެއްބަސްވުމާއެކު 26 މެގަވޮޓްގެ ކަރަންޓް ފޯރުކޮށްދެވޭނެ އިންތިޒާމް ހަމަޖައްސާނެ ކަމަށެވެ.
ރައީސް ވިދާޅުވީ މި މަސައްކަތް އަންނަ އަހަރުގެ ޖުލައި މަހުގެ ތެރޭގައި ނިމޭނެ ކަމަށެވެ. އަދި މި މަސައްކަތް ނިމުމުން ކުރިއަށްއޮތް 20 އަހަރަށް އައްޑޫގެ ކަރަންޓްގެ މައްސަލަ ހައްލުވީ ކަމަށް އެމަނިކުފާނު ވިދާޅުވިއެވެ.
އެމަނިކުފާނު ވިދާޅުވީ އައްޑޫގެ ކަރަންޓްގެ މައްސަލަ ހައްލުކުރާއިރު، އެކަމަށް އެންމެ ބޮޑަށް ހުރަސްއެޅޭނީ ކައުންސިލަށް ކަމަށެވެ. އެހެންކަމުން ޕީއެންސީގެ ކައުންސިލަރުން ހޮވުން މުހިންމު ކަމަށް ވެސް ރައީސް ވިދާޅުވިއެވެ.