ހަނގުރާމައިގެ ސަބަބުން މެދުކަނޑާލި ޔުނައިޓެޑް އެރަބް އެމިރޭޓްސް (އޫއޭއީ) ގެ އިއްތިހާދު އެއާވޭސް ދަތުރުތައް މިއަދު އަލުން ރާއްޖެއަށް ފަށާނެކަން އެ އެއާލައިނުން ހާމަކޮށްފިއެވެ.
އިއްތިހާދު އެއާވޭޒްއިނެރުނު ބަޔާނުގައި ބުނީ މިއަދު ފެށިގެން މި ހިނގާ މާޗުމަހުގެ 19 ވަނަ ދުވަހުގެ ނިޔަލަށް އެ އެއާލައިނުގެ ދަތުރުތައް އަލުން ފަށަން ނިންމާފައިވަނީ ވަކި ހާއްސަ މަންޒިލުތަކަށް ކަމަށެވެ.
މި ދަތުރުތައް އަލުން ފަށަން ނިންމީ ކަމާބެހޭ އިދާރާތަކާ ގުޅިގެން ސަލާމަތީ ގޮތުން ބަލަންޖެހޭ ކަންކަން ފުރިހަމައަށް ކަށަވަރު ކުރުމަށްފަހުގައި ކަމަށް އިއްތިހާދުން މައުލޫމާތު ދެއެވެ.
މި މުއްދަތުގައި އަބޫދާބީއާއި ދުނިޔޭގެ މުހިންމު 25 މަންޒިލަކާ ދެމެދު ދަތުރުތައް ކުރިއަށްދާނެ އެވެ. އޭގެ ތެރޭގައި ދިވެހިރާއްޖޭގެ ބައިނަލްއަގްވާމީ ވެލާނާ ވައިގެ ބަނދަރަށް ކުރާ ދަތުރުތަކުގެ އިތުރުން ލަންޑަން، ނިއުޔޯކް، ފްރެންކްފަޓް، މިލާން، ޕެރިސް، ޓޮރޮންޓޯ، ކުއާލަލަމްޕޫރު، ކޮލަމްބޯ އަދި ބެންކޮކް ފަދަ ސިޓީތައް ހިމެނެ އެވެ.
މި ދަތުރުތަކުގެ ބޭރުން އަބޫދާބީއަށް ކުރަން ހަމަޖެހިފައިވާ އެހެން ހުރިހާ ޝެޑިއުލް ފްލައިޓްތަކެއް އަދިވެސް އޮތީ މެދުކަނޑާލާފަ އެވެ. އަދި ހާލަތަށް ބަލައި އިތުރު މަންޒިލްތަކަށް ދަތުރުތައް ފަށަން ނިންމައިފި ނަމަ އެކަން އަންގާނެ ކަމަށް އިއްތިހާދުން ބުނެ އެވެ.
ދަތުރުތައް މެދުކަނޑާލުމުގެ ސަބަބުން ދަތުރު ނުކުރެވިފައިވާ ފަރާތްތަކަށް އިސްކަންދީގެން ޖާގަ ހަމަޖައްސައިދިނުމުގެ މަސައްކަތް ވެސް އެ އެއާލައިނުން ކުރަމުންދާއިރު 28 ފެބްރުއަރީގެ ކުރިން ޓިކެޓް ނަގާފައިވާ އަދި 21 މާޗުއާ ހަމައަށް ދަތުރުކުރަން އޮތް ފަރާތްތަކަށް، އެއްވެސް އިތުރު ފީއަކާ ނުލައި 15 މެއި 2026 ގެ ކުރިން ދަތުރުގެ ތާރީހު ބަދަލުކުރެވޭނެ ކަމަށް އެއާލައިނުން މައުލޫމާތު ދެއެވެ. އަދި 10 މާޗްއާ ހަމައަށް ދަތުރުކުރަން އޮތް ފަރާތްތަކަށް، ދަތުރު ކެންސަލްކޮށް ރީފަންޑަށް އެދުމުގެ ފުރުސަތު އޮންލައިން ފޯމު މެދުވެރިކޮށް ލިބިގެންދާނެ އެވެ.
އިއްތިހާދު އެއާވޭސްއަކީ ޔޫއޭއީގެ ގައުމީ އެއް އެއާލައިނެވެ. އަދި އެއީ އެ ގައުމުގެ ދެވަނައަށް އެންމެ ބޮޑު އެއާލައިނެވެ. އެ އެއާލައިނުން ރާއްޖެއަށް ދަތުރުތައް ފަށާފައިވަނީ ނޮވެމްބަރު 1، 2011 ގައެވެ.
މެދުއިރުމަތީގެ ހަމަނުޖެހުންތަކާ ގުޅިގެން ބައިނަލްއަގުވާމީ މަދަނީ ވައިގެ އުދުހުންތަކަށް އައިސްފައިވާ ބަދަލުތަކާ ގުޅިގެން ރާއްޖެއަށް އައު އެއާލައިންތައް ގެނައުމުގެ މަސައްކަތް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ވަނީ ފަށާފައެވެ.
އެގޮތުން ހަނގުރާމައިގެ ސަބަބުން ކުރާ އަސަރު ކުޑަކުރުމަށްޓަކައި ދެކުނު އިރުމަތީ އޭޝިޔާއާއި އިރުމަތީ އޭޝިޔާ އަދި އިންޑިޔާގެ އިތުރު އެއާލައިންތަކުން ރާއްޖެއަށް ގެނައުމާ ގުޅޭ ގޮތުން މަޝްވަރާތައް ދަނީ ކުރިއަށެވެ.