ސޯޝަލް ހައުސިންގެ ދަށުން ދޫކޮށްފައިވާ ފުލެޓްތައް ކުއްޔަށް ދިނުން ހުއްޓުވަން ގާނޫނެއް ހެދުމުގެ މަސައްކަތް ކުރަމުން އަންނަ ކަމަށް ހައުސިން މިނިސްޓަރު ޑރ. އަބްދުالله މުއްތަލިބު މިއަދު ވިދާޅުވެއްޖެއެވެ.
ސަރުކާރުން ބޯހިޔާވަހިކަމަށް ދޫކޮށްފައިވާ ސޯޝަލް ހައުސިންގެ ފްލެޓްތައް ކުއްޔަށްދޫކުރުމަކީ އާންމު ކަމެކެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި މުއްތަލިބު ވިދާޅުވީ، ހިޔާ ފްލެޓްތައް ދޫކުރަން ހަދައިފައިވާ އެއްބަސްވުމުގެ ދަށުން، އެ ފުލެޓުތައް ކުއްޔަށް ދިނަސް ދައުލަތަށް އަތުލެވޭނެ ގޮތެއް މިހާރު ނެތް ކަމަށެވެ.
އެހެންނަމަވެސް ސޯޝަލް ހައުސިން ސްކީމްތައް ހިންގާ އުސޫލުތަކާއި ސިޔާސަތުތަކަށް ބަލާއިރު، އެގޮތަށް ފުލެޓް ކުއްޔަށް ދިނުމަކީ ކުރެވޭނެ ކަމެއް ނޫން ކަމަށް އޭނާ ވިދާޅުވިއެވެ. އެހެންވެ، އެއްބަސްވުން އޮތަސް، ފިޔަވަޅު އެޅޭނެ ގޮތެއް ހެދުމަށް ޓަކައި ގާނޫނު އިސްލާހު ކުރަން ޖެހޭ ކަމަށް މުއްތަލިބު ވިދާޅުވިއެވެ.
”އެހެންވީމަ ގާނޫނުން ކަނޑައަޅަން މި އުޅެނީ އެގޮތަށް ކުއްޔަށް ދިނުމަކީ މަނާ ކަމެއް ކަމަށް،“ މިނިސްޓަރު ވިދާޅުވިއެވެ.
ފަހި ފްލެޓެއް ބިދޭސީންނަށް ކުއްޔަށްދީފައިވާތީ އެތަނުގެ ވެރިފަރާތް 50،000 ރ. އިން ޖޫރިމަނާކޮށް، ބިދޭސީން އެތަނުން ނެރުމަށް އެފްޑީސީން ދާދިފަހުން އެނގިއެވެ.