ޔަހޫދީ އިސްރާއީލުން އީރާނަށް ދިން އުދުވާނީ ހަމަލާއާ ގުޅިގެން މެދުއިރުމަތީގެ މަޝްރަހް ހޫނުވެ، ވައިގެ ސަރަހައްދު ބަންދުކުރުމާ ގުޅިގެން ރާއްޖެއިން މެދުއިރުމައްޗަށް ކުރާ ވައިގެ ދަތުރުތައް ހުއްޓިއްޖެއެވެ.
އެމެރިކާ އާއި އިސްރާއީލު ގުޅިގެން އީރާނަށް ހަމަލާދީ އެތައް ބަޔަކު ޝަހީދުކޮށްލުމުން އީރާނުން ވަނީ އަރަބި ގައުމުތަކުގައި ހުރި އެމެރިކާގެ މިލިޓަރީ ބޭސްތަކަށް ހަމަލާތަކެއް ދީފައެވެ.
މިކަމާ ގުޅިގެން މުޅި މެދުއިރުމަތި ވަނީ ހުއްޓުމަކަށް އައިސްފައެވެ.
މެދުއިރުމަތިން މިއަދު ރާއްޖެ އަންނަން އޮތް އަދި ރާއްޖެއިން ފުރަން އޮތް ފްލައިޓްތައްވެސް ވަނީ ކެންސަލްކޮށްފައެވެ. މިކަން ވެލާނާ އިންޓަރނޭޝަނަލް އެއާޕޯޓް ހިންގާ ވީއައިއޭއިން ވެސް ވަނީ ކަށަވަރުކޮށްދީފައެވެ.
އެމްއޭސީއެލްގެ މެނޭޖިން ޑިރެކްޓަރު އަހުމަދު ޝަރީފު މުހައްމަދު ވިދާޅުވީ މެދުއިރުމަތީގެ ބޮޑެތި ހުރިހާ ސަރަހައްދުތަކަކަށް ކުރާ ދަތުރުތައް ހުއްޓުމަކަށް އައިސްފައިވާކަމަށެވެ. އެގޮތުން ދަތުރުތައް ހުއްޓުމާ ގުޅިގެން ދިމާވާ ކަންކަން ހައްލުކުރުމަށް ރިސޯޓްތަކާއި އެއާލައިންތަކާ ގުޅިގެން މަސައްކަތް ކުރަމުން އަންނަކަން ޝަރީފް ވިދާޅުވިއެވެ.