ރޯދަވެރިޔާއަށް ޙަޤީޤީ ކާމިޔާބު ލިބޭނީ ރިވެތި އަޚުލާޤުން އޭނާގެ ނަފުސު ތަހުޒީބުކުރުމުން ކަމަށް މިއަދުގެ ހުކުރު ހުތުބާގައި ބުނެފިއެވެ.
”ނަޞްރާއި ކާމިޔާބުގެ މައްސަރު“ މި މައުޟޫއަށް މިއަދު ދިން ހުތުބާގައި ބުނީ، މި ބަރަކާތްތެރި ރަމަޟާންމަހަކީ ހަމައެކަނި ކެއުމާއި ބުއިމުން ދުރުހެލިވުމުގެ މަހެއް ނޫން ކަމަށާއި، މިއީ އިންސާނާގެ ހަވާނަފުސާ ދެކޮޅަށް އެންމެ ފުރިހަމަ މާނައިގައި ޖިހާދުކުރެވޭ މައްސަރު ކަމަށެވެ.
ހުތުބާގައި ފާހަގަކުރި ގޮތުގައި، ރޯދައިގެ ސަބަބުން އިންސާނާގެ ހަވާނަފުސުގެ އެދުންތަކުގެ މައްޗަށް ގަދަވެގަނެ، ނަފުސު ތަހުޒީބުކުރުމަށް ބާރުއަޅައެވެ. ރޯދަވެރިޔާ އޭނާގެ ކުރިމަތީގައި الله سُبْحَانَهُ وَتَعَالَى ޙަލާލުކުރައްވައިފައިވާ ކާތަކެއްޗާއި ފެން ހުރި ނަމަވެސް، އެކަލާނގެ އަމުރުފުޅަށް ބޯލަނބައި އެ ތަކެއްޗާ ދުރުހެލިވެ ހުންނަ ހުރުމަކީ ކެތްތެރިކަމުގެ އެންމެ މަތީ ދަރަޖައެވެ. މި މަތިވެރި ޖިހާދަކީ މުޅި އަހަރުދުވަހު ޙަރާމްކުރައްވައިފައިވާ ޢަމަލުތަކުން ދުރުހެލިވުމަށް ލިބޭ ނުހަނު މަތިވެރި ތަމްރީނެކެވެ.
ރޯދަވެރިޔާގެ ޙަޤީޤީ ކާމިޔާބު އޮތީ ރިވެތި އަޚުލާޤުން އޭނާގެ ނަފުސު ތަހުޒީބުކުރުމުގައިކަން ހާމަކުރައްވަމުން ހުތުބާގައި ކީރިތި ރަސޫލާގެ ޙަދީޘެއް ބަޔާންކުރެއްވިއެވެ. ”ދޮގުވާހަކަދެއްކުމާއި އެ ފަދަ ޢަމަލުތައް ކުރުމާއި، ޒުވާބުކޮށް ހުތުރު އެއްޗެތި ގޮވައި، ޖާހިލުކަން އިސްކޮށް އުޅޭ މީހަކު، ކެއުމާއި ބުއިމުން ދުރުހެލިވެ ހުރުމަކަށް، ﷲ تَعَالَى އެދިވޮޑިއެއްނުގަންނަވައެވެ.“
ރަމަޟާންމަހަކީ އިސްލާމްދީނުގެ ޢަދުއްވުންނާ ދެކޮޅަށް މުސްލިމުން އެންމެ ބޮޑެތި ކާމިޔާބީތައް ޙާޞިލުކުރި މައްސަރުކަން ވެސް ހުތުބާގައި ހަނދާންކޮށްދިނެވެ. އެގޮތުން ހިޖުރައިން ދެވަނަ އަހަރުގެ ރަމަޟާން މަހުގެ 20 ވަނަ ދުވަހު ހިނގި ބަދުރު ހަނގުރާމައާއި، ހިޖުރައިން 2 ވަނަ އަހަރު އަންދަލުސް ފަތަޙަވުމާއި، ތަތާރުންގެ މައްޗަށް މުސްލިމުން ހޯދި ވަރުގަދަ ކާމިޔާބީތައް ހުތުބާގައި ފާހަގަކުރިއެވެ.
ހުތުބާގައި ގޮވާލީ ރޯދަމަހުގެ ކާމިޔާބީ ހޯދާން ބޭނުން މީހާ ލައިލަތުލްޤަދުރި ހޯދާން ގަދައަޅައި މަސައްކަތްކުރުމަށެވެ. ހުތުބާގައި ބުނިގޮތުގައި އެ ރޭގެ ހެޔޮކަމުން މަޙުރޫމުވެއްޖެ މީހާ، ހުރިހައިހެޔޮކަމަކުން މަޙުރޫމުވެއްޖެއެވެ.
ހުތުބާ ނިންމާލަމުން ވަނީ ރަމަޟާންމަހަކީ ކަންނެތްވެ، މަސައްކަތްތައް ހުއްޓާލައި ނިދުމުގެ މަހެއް ނޫންކަމަށް ބުނެފައެވެ. އޭގެ ބަދަލުގައި މިއީ އަޅުކަމުގައި ހީވާގިވެ ކުރިއަރައިދާންވީ މައްސަރު ކަމަށާއި، ޚާއްޞަކޮށް ރަމަޟާން މަހުގެ ފަހު ދިހައަކީ އަޅުކަމުގެ ކަމަރު ބަންނަންވީ ދުވަސްތައް ކަމަށް ނަސޭހަތްތެރިވެފައެވެ.