ގދ. ތިނަދޫ މަގު ހެދުމުގެ ތިން ވަނަ ފިޔަވަހީގެ މަސައްކަތް ރޯޑް ޑިވެލޮޕްމެންޓް ކޯޕަރޭޝަން، (އާރްޑީސީ) އާ ހަވާލުކޮށްފި އެވެ.
މި މަޝްރޫޢުގެ އެއްބަސްވުމުގައި މިއަދު ކޮންސްޓްރަކްޝަން މިނިސްޓްރީގެ ފަރާތުން ސޮއި ކުރެއްވީ މިނިސްޓަރު ޑރ. އަބްދުﷲ މުއްޔަލިބެވެ. އާރްޑީސީގެ ފަރާތުން ސޮއި ކުރެއްވީ މެނޭޖިން ޑިރެކްޓަރ އިބްރާހީމް ނަޒީމެވެ.
ތިނަދޫ ސިޓީ މަގުހެދުމުގެ ތިން ވަނަ ފިޔަވަހީގެ ދަށުން، ޖުމްލަ 50 މަގެއް ޒަމާނީ ފެންވަރަށް ތަރައްގީ ކުރާނެ އެވެ. އެގޮތުން މަގުތަކުގައި ފެން ހިންދާ ނިޒާމު ގާއިމުކޮށް ތާރު އަޅައި، ލައިޓްތައް ޖަހާނެއެވެ. އާރްޑީސީއާ މަޝްރޫއު ހަވާލުކުރީ މަސައްކަތް ފަށާތާ 1440 ދުވަހުގެ ތެރޭގައި ނިންމާ ގޮތަށް 341 މިލިޔަން ރުފިޔާއަށެވެ.
މިނިސްޓަރު މުއްޠަލިބް ވިދާޅުވީ، މި މަޝްރޫޢުގެ ތެރޭގައި ތިނަދޫގައި އަލަށް އާބާދުވާ ސަރަހައްދުގެ ބޮޑެތި މަގުތައް ހަދާނެ ކަމަށެވެ. އަދި މި މަޝްރޫއު ނިމޭ އިރު އެ ސިޓީ އަކީ ހުރިހާ މަގެއް ޒަމާނީ ފެންވަރަށް ތަރައްޤީކުރެވިފައިވާ ސިޓީއަކަށް ވެގެންދާނެ ކަމަށް ވިދާޅުވި އެވެ.