ބަންގްލަދޭޝްގައި ބުރާސްފަތި ދުވަހު ބޭއްވި ތާރީޚީ އާންމު އިންތިޚާބުގައި، ތާރިޤް ރަޙްމާންގެ ބަންގްލަދޭޝް ނޭޝަނަލިސްޓް ޕާޓީ (ބީއެންޕީ) އިން ބޮޑު އަޣުލަބިއްޔަތެއް ހޯދައި، އާ ސަރުކާރު އެކުލަވާލާނެކަން އިއުލާނުކޮށްފިއެވެ.
ވަގުތީ ނަތީޖާތަކާ ހަވާލާދީ ޖަމުނާ ޓީވީން ރިޕޯޓުކޮށްފައިވާ ގޮތުގައި، ވޯޓުލުން ކުރިއަށްދިޔަ 299 ދާއިރާގެ ތެރެއިން ބީއެންޕީ އާއި އެ ޕާޓީގެ އިއްތިހާދުން ވަނީ 211 ގޮނޑި ކާމިޔާބުކޮށްފައެވެ. މިއާ ޚިލާފަށް ވާދަވެރި ޖަމާއަތޭ އިސްލާމީގެ ކޯލިޝަނަށް ކާމިޔާބު ކުރެވިފައިވަނީ 70 ގޮނޑިއެވެ. ނަމަވެސް ބަންގްލަދޭޝްގެ އިލެކްޝަން ކޮމިޝަނުން އަދި ރަސްމީ ނަތީޖާ އިއުލާނުކޮށްފައެއް ނުވެއެވެ.
މި ނަތީޖާތަކާ ގުޅިގެން ޖަމާއަތޭ އިސްލާމީގެ ވެރިޔާ ޝަފީޤުއްރަޙްމާން ވިދާޅުވީ، އިންތިޚާބުގެ ނަތީޖާ ނުކުންނަ ގޮތެއް އެ ޕާޓީން ގަބޫލުކުރާނެ ކަމަށެވެ. އަދި އިންތިޚާބުން ބަލިވެއްޖެނަމަ، ސަރުކާރަށް ޖެއްސުންކުރުމުގެ ސިޔާސަތު ނުގެންގުޅުއްވާނެ ކަމަށްވެސް އޭނާ ވިދާޅުވިއެވެ.
ބަންގްލަދޭޝްގެ ގާނޫނު ހަދާ މަޖިލީހުގައި ޖުމްލަ 350 ގޮނޑި ހިމެނޭއިރު، މީގެ ތެރެއިން 300 ގޮނޑިއަކީ ސީދާ ރައްޔިތުންގެ ވޯޓުން އިންތިޚާބު ކުރެވޭ ގޮނޑިތަކެވެ. ބާކީ 50 ގޮނޑި ޚާއްސަކޮށްފައިވަނީ އަންހެނުންނަށެވެ. މިފަހަރު އިންތިޚާބު ބާއްވާފައިވަނީ 299 ދާއިރާއެއްގައެވެ. އެއީ ކެންޑިޑޭޓަކު މަރުވުމާ ގުޅިގެން އެއް ދާއިރާގެ ވޯޓުލުން ފަސްކުރުމުންނެވެ.
މި އިންތިޚާބާ އެކުއެކީގައި، ގައުމުގެ ސިޔާސީ ނިޒާމަށް ގެންނަން ފެންނަ މުހިންމު އިސްލާހުތަކާ ގުޅޭ ފެންނަ ނުފެންނަ ވޯޓެއްވެސް ވަނީ ނަގާފައެވެ. އޭގެ ތެރޭގައި ބޮޑުވަޒީރުކަމުގެ ދައުރު ވަކި މުއްދަތަކަށް ކަނޑައެޅުމާއި، ވެރިކަމުގެ ބާރުތައް ހަމަހަމަކުރުމަށް ހަރުދަނާ ފިޔަވަޅުތައް އެޅުން ހިމެނެއެވެ.
ބަންގްލަދޭޝްގެ ސިޔާސީ މަސްރަހު ފާއިތުވި 15 ވަރަކަށް އަހަރު ކޮންޓްރޯލްކޮށްފައިވަނީ ޝައިޚް ޙަސީނާގެ އަވާމީ ލީގުންނެވެ. ނަމަވެސް، 2024 ވަނަ އަހަރު ދަރިވަރުން އިސްވެ ތިބެ ސަރުކާރާ ދެކޮޅަށް ކުރިއަށް ގެންދިޔަ ވަރުގަދަ މުޒާހަރާތަކާ ގުޅިގެން ޙަސީނާ ވަނީ ގައުމު ދޫކުރައްވައި ވަޑައިގެންފައެވެ. އޭގެފަހުން އުފެއްދި ވަގުތީ ސަރުކާރަކުން ގައުމު ހިންގުމަށްފަހު ބޭއްވި މިއިންތިޚާބަކީ، ބަންގްލަދޭޝްގެ ޑިމޮކްރެޓިކް ހަޔާތުގައި މުހިންމު ބަދަލެއް ގެނުވި އަދި މިނިވަންކަމާއެކު ވޯޓުލުމުގެ ފުރުސަތު ރައްޔިތުންނަށް ލިބުނު ތާރީޚީ އިންތިޚާބެކެވެ.
އިންތިޚާބު ކާމިޔާބުކުރި ބީއެންޕީއަކީ ކުރީގެ ބޮޑުވަޒީރު ޚާލިދާ ޒިޔާގެ ޕާޓީއެވެ. ޚާލިދާ ޒިޔާގެ ސިއްހީ ހާލަތު ހުރިގޮތުން، ފާއިތުވި އަހަރުތަކުގައި ޕާޓީ ހިންގަމުން ގެންދެވީ ލަންޑަނުގައި އަރުވާލެވިގެން ހުންނެވި އޭނާގެ ދަރިކަލުން ތާރިޤް ރަޙްމާނެވެ. އަވާމީ ލީގުގެ ވެރިކަމުގައި ބީއެންޕީގެ ލީޑަރުންނަށް ޖަލު ހުކުމްތައް އައުމާއި ސިޔާސީ ގޮތުން ގިނަ ހުރަސްތަކެއް ކުރިމަތިވިއެވެ. އެހެންކަމުން، ބީއެންޕީން މި ހޯދި ބޮޑު ކާމިޔާބީއަކީ އެ ޕާޓީން ސިޔާސީ މައިދާނަށް އަލުން ނުކުމެ، ގައުމުގެ އެންމެ ނުފޫޒުގަދަ ބާރުގެ ގޮތުގައި ހަމަޖެހިގެން ދިޔަ ކަމެކެވެ.
މި އިންތިޚާބާއެކު ނެގުނު ފެންނަ ނުފެންނަ ވޯޓަކީ ބަންގްލަދޭޝްގެ މުސްތަގުބަލަށް ވަރަށް މުހިންމު ނިންމުމެކެވެ. ކުރިން އޮތް ނިޒާމުގައި ބޮޑުވަޒީރަށް އޮންނަ ހައްދުފަހަނަޅާފައިވާ ބާރުތަކުގެ ސަބަބުން، ވެރިކަން ޚުދުމުޚުތާރު މަގަށް ދިއުމުގެ ފުރުސަތު އޮތީ ހުޅުވިފައެވެ. އާ އިސްލާހުތަކާއެކު ބޮޑުވަޒީރުކަމުގެ ދައުރު ވަކި މުއްދަތަކަށް ކަނޑައެޅި، ގާނޫނު ހަދާ މަޖިލީހުގެ ބާރު ގަދަވެގެންދާނެއެވެ. އަދި ބީއެންޕީއާ ވާދަކޮށް ޖަމާއަތޭ އިސްލާމީން 70 ގޮނޑި ކާމިޔާބުކުރުމާއެކު، އެ ޕާޓީ ވެގެންގޮސްފައިވަނީ ގާނޫނު ހަދާ މަޖިލީހުގެ މައި އިދިކޮޅު ޕާޓީއަށެވެ.