އީރާނުގެ ވައިގެ ދިފާއީ ބާރުތަކުން އެމެރިކާގެ ކްރޫޒް މިސައިލަކާއި ޑްރޯނެއް ވައްޓާލާފައިވާ ކަމަށް އެގައުމުން ބުނެފިއެވެ.
މެދުއިރުމަތީގެ މަސްރަހު އިތުރަށް ނުތަނަވަސްވެފައިވާއިރު، އިރާގުގައި ހުރި އެމެރިކާ ސިފައިންގެ މީހަކު ވެސް ވަނީ މަރުވެފައެވެ.
އީރާނުގެ އަސްކަރީ މީޑިއާއިން ރިޕޯޓްކޮށްފައިވާ ގޮތުގައި، އެގައުމުގެ ހުޅަނގުގެ ވައިގެ ސަރަހައްދަށް ވަތް އެމެރިކާގެ ކްރޫޒް މިސައިލެއް އީރާނުގެ އިންޓެގްރޭޓެޑް ޑިފެންސް ނެޓްވޯކުން ވަނީ ދެނެގަނެ، ވައިގެ ތެރޭގައި ގޮއްވާލާފައެވެ. އީރާނުން ބުނާ ގޮތުގައި މި މިސައިލް ދަތުރުކުރަމުންދިޔަ މަގު ދުރާލައި ދެނެގަނެވިފައިވެއެވެ.
މީގެ އިތުރުން، އީރާނުގެ ދެކުނުގައި އޮންނަ ބަންދަރު އައްބާސް ސަރަހައްދުން އެމެރިކާގެ ’ލޫކަސް‘ މަރުކާގެ ކަމިކާޒޭ ޑްރޯނެއް ވައްޓާލާފައިވާ ކަމަށް ވެސް އީރާނުން ވަނީ ބުނެފައެވެ. އީރާނުގެ ދައުލަތުގެ މީޑިއާއިން ވަނީ ވައްޓާލި ޑްރޯންގެ ބައިތަކާއި ފޮޓޯތައް އާންމުކޮށްފައެވެ. މިއީ މަދު ހަރަދަކުން އުފައްދާފައިވާ، ހަމަލާދިނުމަށް ބޭނުންކުރާ ޑްރޯނެއް ކަމަށް މައުލޫމާތު ލިބެއެވެ.
މި ހަމަލާތަކާ ދިމާކޮށް، އިރާގުގެ އުތުރު ސަރަހައްދުގައި ހަރަކާތްތެރިވަމުންދިޔަ އެމެރިކާ ސިފައިންގެ މީހަކު ވަނީ މަރުވެފައެވެ. އެމެރިކާގެ އަސްކަރިއްޔާއިން މައުލޫމާތުދޭ ގޮތުގައި، އެ މީހާ މަރުވީ ވެއްޓިފައި އޮތް އީރާނުގެ ޑްރޯނެއް ނައްތާލުމަށް މަސައްކަތް ކުރަމުން ދަނިކޮށް ހިނގި ހާދިސާއެއްގައެވެ.
ވޮޝިންޓަން ޕޯސްޓުގެ ރިޕޯޓުގައި ފާހަގަކޮށްފައިވާ ގޮތުގައި، ޖޫން މަހު އެކުލަވައިލި ވަގުތީ ހަނގުރާމަ ހުއްޓާލުމުގެ އެއްބަސްވުން އުވިގެންދިއުމާ ގުޅިގެން، އެމެރިކާ އާއި އީރާނާ ދެމެދު އޮތް ގުޅުން މިހާރު ވަނީ ވަރުގަދަ އަސްކަރީ ކުރިމަތިލުމެއްގެ ތުންފަތްމަތީގައެވެ. މިގޮތުން އެމެރިކާގެ ދިފާއީ އިދާރާތަކުން ކަށަވަރުކޮށްދޭ ގޮތުގައި، އީރާނުގެ އަސްކަރީ އިންފްރާސްޓްރަކްޗަރ، ކޮމާންޑް ސެންޓަރުތަކާއި ހަމަލާދޭ މަރުކަޒުތަކަށް އަމާޒުކޮށް ވަރުގަދަ އަސްކަރީ ކެމްޕޭނެއް ހިންގުމަށް ޕެންޓަގަނުން ދަނީ ތައްޔާރުވަމުންނެވެ.
ހަނގުރާމަ ފުޅާކުރުމުގެ ވިސްނުން އެމެރިކާއިން ގެންގުޅެން ފެށީ، އުރުދުންގައި ހުންނަ މުވައްފަގު ސަލްތީ އެއަރ ބޭސްއަށް ދިން ހަމަލާއާއި، އިރާގުގެ އުތުރުގައި ވައްޓާލި އީރާނުގެ ޑްރޯންއެއް ނައްތާލުމުގެ ތެރޭގައި އެމެރިކާގެ ސިފައިންގެ ބަޔަކު މަރުވުމާ ގުޅިގެންނެވެ.
ވޮޝިންޓަން ޕޯސްޓުން ހާމަކުރި ޕެންޓަގަންގެ އެތެރޭގެ ދިރާސާތަކުން އިންޒާރުދޭ ގޮތުގައި، ދުރު ރާސްތާގެ މިސައިލްތަކާއި ވައިގެ ދިފާއީ ނިޒާމުތަކުގެ ސްޓޮކް މަދުވުމުގެ ސަބަބުން، ހަނގުރާމަ ފުޅާކުރުމުގައި ބޮޑެތި ގޮންޖެހުންތަކެއް ކުރިމަތިވެދާނެއެވެ. މީގެ އިތުރުން، ހަނގުރާމައިގެ ސަބަބުން މަތިންދާބޯޓުތައް މަރާމާތުކޮށް ބެލެހެއްޓުމަށްވެސް ވަނީ ބުރަބޮޑުވެފައެވެ.
ޖޫން މަހުގެ ފަހުމުނާމާ އުވިގެންދިއުމާއެކު، ވޮޝިންޓަނާއި ތެހެރާނުން ވެސް ވަނީ ކުރިން އެއްބަސްވި ކަންކަމުން ފަހަތަށް ޖެހިފައެވެ. އީރާނުގެ އޮފިޝަލުން މިހާރު ހާމަކުރާ ގޮތުގައި އެގައުމު އޮތީ ”ފުރިހަމަ ހަނގުރާމައެއްގެ“ ހާލަތެއްގައެވެ.
