ރައީސުލްޖުމްހޫރިއްޔާ ރިޔާސީ ބަޔާން އިއްވެވުމަށް ބާއްވާ ރައްޔިތުންގެ މަޖިލީހުގެ ޖަލްސާއާ ގުޅިގެން، މަޖިލިސް އިދާރާ ހިމެނޭ ސަރަހައްދުގެ ބައެއް މަގުތަކުގައި ޕާކުކޮށްފައިވާ އުޅަނދުތައް ނެގުމަށް ފުލުހުން އަންގައިފިއެވެ.
ފުލުހުން ބުނީ 2026 ވަނަ އަހަރުގެ ފުރަތަމަ ދައުރުގެ ފުރަތަމަ ޖަލްސާއާ ގުޅިގެން ސަލާމަތީ ފިޔަވަޅެއްގެ ގޮތުން ބައެއް މަގުތައް ހުސްކުރަން ޖެހޭ ކަމަށެވެ. އެގޮތުން މިއަދުގެ 18:00 ގެ ކުރިން އެ ސަރަހައްދުތަކުން އުޅަނދުތައް ނަގައި ހުސްކުރުމަށް ވަނީ އިލްތިމާސްކޮށްފައެވެ.
އުޅަނދުތައް ނަގަން އަންގާފައިވާ ސަރަހައްދުތަކުގެ ތެރޭގައި މެދުޒިޔާރަތް މަގު (ސޯސަންމަގުން ފެށިގެން މުލީއާގެއާ ހަމައަށް)، ހަކުރާ ގޯޅި، ސިއްކަ ގޯޅި، ޝަހީދު އަބްދުﷲ ޒުހައިރު ގޯޅި، އަމީރުއަހްމަދު މަގު (ވެލާނާގެ ސަރަހައްދު) ހިމެނެއެވެ.
ފުލުހުން ބުނީ މިފަދަ ކަންކަމުގައި އާންމު ރައްޔިތުންގެ ފަރާތުން ލިބޭ އެއްބާރުލުމަށް ޝުކުރު ދަންނަވާ ކަމަށެވެ. އަދި މަގުތައް ބަންދުކުރުމާއި ޕާކިން ހުސްކުރުމުގެ ސަބަބުން އާންމުންނަށް ދިމާވެދާނެ ދަތިތަކަށް ފުލުހުން ވަނީ މައާފަށް އެދިފައެވެ.
ކޮންމެ އަހަރަކުވެސް ރިޔާސީ ބަޔާން އިއްވާ ދުވަހަކީ ސަރުކާރު ބަންދު ދުވަހެއްގެ ގޮތުގައި ހަމަޖައްސާ ދުވަހެކެވެ. އެހެންކަމުން މާދަމާ ސަރުކާރު ބަންދު ވާނެއެވެ. މިއަހަރަށް މަޖިލިސް ހުޅުވުމަށް ބާއްވާ ޖަލްސާ ފަށާނީ މާދަމާ ހެނދުނު 09:00 ގައެވެ.