ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން އައްޑޫ ސިޓީގައި އާ ކޯލްސެންޓަރެއް ގާއިމުކޮށް، އަންނަ ޖުލައި މަހުން ފެށިގެން އެ ޚިދުމަތް ފެށުމަށް ނިންމައިފިއެވެ.
އެންސްޕާގެ ސީއީއޯ އާމިނަތު ޝިރުނާ ވިދާޅުވި ގޮތުގައި، އައްޑޫ ސިޓީގައި ގާއިމުކުރާ މި ކޯލްސެންޓަރުގެ ސަބަބުން އެ އިދާރާގެ ޚިދުމަތް ލިބޭ ވަގުތު އިތުރުވެ، ރައްޔިތުންނަށް އިތުރު ލުއިފަސޭހަތަކެއް ލިބިގެންދާނެއެވެ. މިއީ އެންސްޕާގެ ޚިދުމަތްތައް (މަރުކަޒީ ނޫން ގޮތަކަށް) ފުޅާކުރުމަށް ކުރެވޭ މުހިންމު މަސައްކަތެއް ކަމަށް އެ އިދާރާއިން ބުނެއެވެ. މި ކޯލްސެންޓަރު މެދުވެރިކޮށް ހޮޓްލައިން 1402 އަށް ގުޅައިގެން އެ އިދާރާއިން ދޭ މާލީ އެހީތަކާއި އިނާޔަތްތަކާ ގުޅޭ މައުލޫމާތުތައް ފަސޭހަކަމާއެކު ރައްޔިތުންނަށް ސާފުކުރެވޭނެއެވެ.
އެންސްޕާގެ ހޮޓްލައިން މެދުވެރިކޮށް މެޑިކަލް ވެލްފެއަރ، ބޭސްފަރުވާގެ އެހީ، ނުކުޅެދުންތެރިކަން ހުންނަ ފަރާތްތަކަށް ދޭ މާލީ އެހީ، އަދި ފޯމު ފުރުމުގައި އެހީތެރިކަން ބޭނުންވާ ފަރާތްތަކަށް އެހީތެރިކަން ފޯރުކޮށްދިނުމަށް ވަނީ ހަމަޖެހިފައެވެ. މީގެ އިތުރުން، އެންސްޕާގެ ގިނަ ޚިދުމަތްތަކެއް މިހާރު ވަންގަވް (OneGov) މެދުވެރިކޮށް އޮންލައިންކޮށް ހުށަހެޅޭނެ އިންތިޒާމު ވެސް ވަނީ ހަމަޖެހިފައެވެ.
ވަންގަވް މެދުވެރިކޮށް ފަގީރު ހާލަތުގައި ދިރިއުޅޭ އެކަނި ދަރިން ބަލަހައްޓާ މައިންނާއި ބަފައިންނަށް ދޭ މާލީ އެހީ އާއި، ކާބޯތަކެތި ގަތުމަށް ދޭ އެހީ، އަދި ތެލެސީމިއާ އެލަވަންސް ފަދަ ޚިދުމަތްތަކަށް ފޯމު ހުށަހެޅޭނެއެވެ. ހަމައެއާއެކު، ނުކުޅެދުންތެރިކަން ހުންނަ ފަރާތްތަކަށް ބޭނުންވާ ތެރަޕިއުޓިކް ފަރުވާގެ އެހީ އާއި، އެހެން މީހުންގެ ބެލުމުގެ ދަށުގައި ތިބޭ ކުދިންނަށް ދޭ މާލީ އެހީގެ ޕްރޮގްރާމްތަކަށް ވެސް މި ޕޯޓަލް މެދުވެރިކޮށް އެދެވޭނެއެވެ.