އެމެރިކާއިން އިރާނަށް އެއްވެސް ކަހަލަ ހަމަލާއެއް ދީފިނަމަ، މުޅި ސަރަހައްދަށް ފެތުރިގެންދާނެ ބޮޑު ހަނގުރާމައެއް ފެށިދާނެކަމުގެ ހަރުކަށި އިންޒާރު އީރާނުގެ އެންމެ މަތީ ވެރިޔާ އަލީ ޚާމަނާއީ، ދެއްވައިފިއެވެ.
އީރާނުގެ ދައުލަތުގެ މީޑިއާތަކުން އިއްޔެ ރިޕޯޓްކޮށްފައިވާ ގޮތުގައި، ޚާމަނާއީ މިހެން ވިދާޅުވީ 1979 ވަނަ އަހަރު އާޔަތުﷲ ރުހުﷲ ޚުމައިނީ އަރުވާލެވިގެން ހުންނެވުމަށްފަހު އެނބުރި ރަށަށް ވަޑައިގެންނެވި ހަނދާނީ މުނާސަބަތުގައި ވާހަކަފުޅު ދައްކަވަމުންނެވެ. މި މުނާސަބަތަކީ އީރާނުގެ އިންގިލާބުގެ ފެށުން ކަމުގައި ބެލެވޭ މުހިންމު ދުވަހެކެވެ.
ޚާމަނާއީ ވިދާޅުވީ، މިފަހަރު އެމެރިކާ އިން ހަނގުރާމައެއް ފަށައިފިނަމަ، އެއީ ސަރަހައްދީ ބޮޑު ހަނގުރާމައަކަށް ވާނެކަން އެމީހުން ދަންނަން ޖެހޭނެ ކަމަށެވެ. މި އިންޒާރު އައީ އެމެރިކާގެ ރައީސް ޑޮނަލްޑް ޓްރަމްޕް މެދުއިރުމައްޗަށް އަސްކަރީ މަނަވަރުތަކާއި ޖެޓްތައް ފޮނުވައި، އަސްކަރީ ބާރު ގަދަކުރަމުންދާ ދަނޑިވަޅެއްގައެވެ.
ޚާމަނާއީ ތުހުމަތު ކުރެއްވި ގޮތުގައި، އެމެރިކާގެ އަސްލު ބޭނުމަކީ އިރާނުގެ ތެލާއި ގޭހުގެ ވަސީލަތްތައް އަތުލައިގަތުމެވެ. އަދި އިންސާނީ ހައްގުތަކުގެ ވާހަކައަކީ ހަމައެކަނި ދެއްކުންތެރިކަމެއް ކަމަށް ވެސް ވިދާޅުވިއެވެ.
ޓްރަމްޕް ބުނެފައިވަނީ އިރާނުން އޮތީ ވާހަކަދައްކަން ތައްޔާރަށް ކަމަށާއި، އިރާނުން ނިއުކްލިއާ ހަތިޔާރު އުފެއްދުން ހުއްޓާލުމުގެ އެއްބަސްވުމަކަށް އައުމަށް ބޭނުންވާ ކަމަށެވެ. އިރާނުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ ވެރިޔާ އަލީ ލަރީޖާނީވެސް ވަނީ އެމެރިކާއާއެކު މަޝްވަރާކުރަން ތައްޔާރަށް އޮތްކަން ހާމަކުރައްވައިފައެވެ.
މި ނުތަނަވަސްކަން އިތުރުވެފައިވަނީ މިދިޔަ ޖޫން މަހު އިސްރާއީލާއި އެމެރިކާ ގުޅިގެން އީރާނުގެ ނިއުކްލިއާ މަރުކަޒުތަކަށް ހަމަލާތަކެއް ދީފައިވާ ދަނޑިވަޅެއްގައެވެ.