އަންނަ ލޯކަލް ކައުންސިލް އިންތިޚާބުގައި މާލޭ ސިޓީގެ މޭޔަރުކަމަށް އިންތިޚާބުކޮށްދީފިނަމަ، ސިޔާސީ ވިސްނުމަށް ނުވަތަ ގިންތިއާއި ފަންތިއަށް ބެއްލެވުމެއް ނެތި ހުރިހާ ރައްޔިތުންނަށް ހަމަހަމަކަމާއެކު ހިދުމަތްކުރައްވާނެ ކަމަށް ވެރިކަންކުރާ ޕީޕަލްސް ނޭޝަނަލް ކޮންގުރެސް (ޕީއެންސީ) ގެ ކެންޑިޑޭޓު މޭޖާ ޖެނަރަލް ރިޓަޔާޑް މޫސާ އަލީ ޖަލީލު ވިދާޅުވެއްޖެއެވެ.
ޖަލީލުގެ ކެމްޕެއިން ޖަގަހަ ހުޅުވުމަށް ރޭ ބޭއްވި ރަސްމިއްޔާތުގައި ވާހަކަދައްކަވަމުން އޭނާ ވިދާޅުވީ، މާލޭ ސިޓީގެ މޭޔަރަކަށް އިންތިހާބުވުމުގެ ދަތުރު ފައްޓަވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މޭޔަރުކަމުގައި ހުންނެވި އިރު ދެއްކެވި ހިތްވަރާއި ހިންމަތް ނަމޫނާއަކަށް ބަލައިގެން ކަމަށެވެ. މާލޭގެ ރައްޔިތުން ބޭނުންވާ ގޮތަށް ކަންކަން ކުރަން ފެށުނީ 2021 ވަނަ އަހަރު ރައީސް މުޢިއްޒު މޭޔަރުކަމަށް އިންތިހާބުވެވަޑައިގަތުމުން ކަމަށްވެސް ޖަލީލު ވިދާޅުވިއެވެ.
”ތިޔަ ލޮބުވެތި ރައްޔިތުންގެ ހިދުމަތުގައި އަޅުގަނޑު ހުންނާނީ 24 ގަޑިއިރު ތައްޔާރަށް. ގައުމީ ހިދުމަތް ރޭދުވާ ހޭދަކޮށްލައިގެން އަޅުގަނޑު ދޭނީ ރައްޔިތުންގެ މުހުތާދުތައް ފުއްދައިދިނުމާއި މާލޭ ސިޓީއަށް މާ ޗާލު ހާއުފާވެރި މާ ހިތްގައިމު އާ ޒަމާނެއް ހޯދައިދިނުމަށްޓަކައި،“ ރައްޔިތުންނަށް ހިދުމަތް ކުރުމުގައި ސާބިތުވެ ހުންނާނެކަމަށް ވިދާޅުވަމުން ޖަލީލު ވިދާޅުވެފަވެއެވެ.
ޖަލީލު އިތުރަށް ވިދާޅުވީ އޭނާ މަސައްކަތް ކުރައްވާނީ ވަކި ކުލައަކަށް ތަފާތުކުރުމެއް ނެތް ރައްޔިތުންގެ ހާދިމެއްގެ ގޮތުގައި ކަމަށެވެ. އަދި މާލޭގެ ރައްޔިތުންގެ ހިތްތައް ފަތަހަ ކުރާނީ ލޯތްބާއި އޯގާތެރިކަމާއެކު، ސަރުކާރާ ގުޅިގެން ރައްޔިތުން ބޭނުންވާ ހިދުމަތްތައް ފޯރުކޮށްދީގެން ކަމަށްވެސް އޭނާ ވިދާޅުވިއެވެ.
ޖަލީލު ވަނީ މާލޭ ސިޓީއަކީ ދިރިއުޅެން ފަސޭހަ، ފަހި އަދި ސާފު ތަނަކަށް ހެއްދެވުމަށް ބޭނުންފުޅުވާ ކަމަށް ވިދާޅުވެ، ހުރިހާ ރައްޔިތުންނަށް ހަމަހަމަކަމާއެކު ހިދުމަތް ކުރައްވާނެ ކަމުގެ ފުރިހަމަ ޔަގީންކަން އަރުވާފައެވެ.
ރޭގެ ރަސްމިއްޔާތުގައި ޖަލީލުގެ ކެމްޕޭން ޖަހަގަ ހުޅުއްވައިދެއްވީ ނައިބު ރައީސް ހުސައިން މުހައްމަދު ލަތީފެވެ.