ރާއްޖޭގެ ފަތުރުވެރިކަމުގެ ސިނާއަތުން ނަގާ ގްރީން ޓެކުހުގެ އާމްދަނީ، އޭގެ ކުރީ އަހަރާ އަޅާބަލާއިރު 108 އިންސައްތަ އިތުރުވެފައިވާ ކަމަށް މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން ހާމަކޮށްފިއެވެ.
މީރާއިން އެންމެ ފަހުން އާންމުކޮށްފައިވާ ތަފާސްހިސާބުތަކަށް ބަލާއިރު، ނިމިދިޔަ 2025 ވަނަ އަހަރު ގްރީން ޓެކުހުގެ ގޮތުގައި ދައުލަތަށް ވަނީ ޖުމްލަ 2,251,452,004 ރުފިޔާ ލިބިފައެވެ. މިއީ 2024 ވަނަ އަހަރު ލިބުނު 1,080,712,329 ރުފިޔާއާ އަޅާބަލާއިރު 108 އިންސައްތަ ބޮޑު އިތުރުވުމެކެވެ.
ގްރީން ޓެކުހުގެ އާމްދަނީއަށް މިހާ ބޮޑު ކުރިއެރުމެއް ލިބިފައިވާ މައިގަނޑު ސަބަބަކީ ސަރުކާރުން ޓެކްސް ރޭޓުތަކަށް ގެނައި ބަދަލުތަކާއި، ރާއްޖެއަށް ޒިޔާރަތްކުރި ފަތުރުވެރިންގެ އަދަދު ރެކޯޑް މިންވަރަކަށް އިތުރުވުމެވެ. އެގޮތުން 2025 ވަނަ އަހަރަކީ ރާއްޖޭގެ ފަތުރުވެރިކަމުގެ ތާރީހުގައިވެސް އެންމެ ގިނަ ފަތުރުވެރިން ޒިޔާރަތްކުރި އަހަރެވެ. އަހަރު ނިމުނުއިރު ޖުމްލަ 2.2 މިލިއަން ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ.
1 ޖަނަވަރީ 2025 އިން ފެށިގެން އަމަލުކުރަން ފެށި އާ ރޭޓުތަކަށް ބަލާއިރު، ކުރިން 6 ޑޮލަރު ނަގަމުންދިޔަ ރިސޯޓު ފަދަ ތަންތަނުން މިހާރު 12 ޑޮލަރު އަދި ކުރިން 3 ޑޮލަރު ނަގަމުންދިޔަ ގެސްޓްހައުސް ފަދަ ތަންތަނުން 6 ޑޮލަރު ގްރީން ޓެކުހުގެ ގޮތުގައި ނަގައެވެ. ނަމަވެސް، އުމުރުން 2 އަހަރު ނުވާ ކުޑަކުދިން މި ޓެކުހުން ވަނީ އިސްތިސްނާކޮށްފައެވެ.
ދައުލަތުގެ ބަޖެޓް ޕޮޒިޝަން ރިޕޯޓުގައި ކުރިން އަންދާޒާކޮށްފައި އޮތީ ޓެކްސް ރޭޓަށް ގެނައި ބަދަލާއެކު އާމްދަނީ އިތުރުވާނީ 95.2 އިންސައްތަ ކަމަށެވެ. އެހެންނަމަވެސް، އަހަރު ނިމުނުއިރު ލިބުނު އާމްދަނީ ވަނީ އަންދާޒާ ކުރިވަރަށްވުރެ ބޮޑުތަން އިތުރުވެފައެވެ.
ގްރީން ޓެކުހަކީ ރާއްޖޭގެ ތިމާވެށްޓާ ގުޅުންހުރި އެކި މަޝްރޫއުތަކަށް ބޭނުންވާ ފައިސާ ހޯދުމުގެ މަގްސަދުގައި، ރާއްޖޭގެ ރިސޯޓުތަކާއި، ގެސްޓްހައުސް، ސިޓީ ހޮޓާ އަދި ސަފާރީތަކުގައި މަޑުކުރާ ބޭރުގެ ފަތުރުވެރިންގެ އަތުން ނަގަމުން އަންނަ ޓެކުހެކެވެ. މި ފައިސާ މައިގަނޑު ގޮތެއްގައި ހޭދަކުރަނީ ރަށްރަށުގެ ފެނާއި ނަރުދަމާގެ ނިޒާމު ގާއިމުކުރުމާއި، ކުނި މެނޭޖްކުރުން ފަދަ ތިމާވެށީގެ މުހިންމު މަޝްރޫއުތަކަށެވެ.