އެމެރިކާއިން ދުނިޔޭގެ ހަމަޖެހުން ނަގާލަމުންދާ ކަމަށް ޖަރުމަނުގެ ރައީސް ފްރޭންކް ވޯލްޓަ ސްޓޭއިންމައިއާ ވިދާޅުވެއްޖެއެވެ.
ޖަރުމަނުގެ ރައީސް ވަނީ އެމެރިކާގެ ރައީސް ޑޮނަލްޑް ޓްރަމްޕަށާއި އޭނާގެ ސަރުކާރަށް ވަރަށް ބޮޑަށް ފާޑުވިދާޅުވެ، ދުނިޔޭގެ ނިޒާމު ރޫޅިގެން ދަނީ އެމެރިކާގެ ސަބަބުން ކަމަށް ވިދާޅުވެފައެެވެ.
އެމެރިކާއިން ދާދި ފަހުން ވެނެޒުއެލާގެ ރައީސް ނިކޮލަސް މަޑޫރޯ ވަގަށް ނެގުމަށް ވެނެޒުއޭލާއަށް އަރައިގަނެ ހިންގި އަމަލުތަކަށް އިޝާރާތް ކުރައްވާ ޖަރުމަނުގެ ރައީސް ވިދާޅުވީ ދުނިޔޭގެ ޑިމޮކްރަސީއަށް މީގެ ކުރިން ދުވަހަކުވެސް ނުލިބުނު ހަމަލާތަކެއް ޓްރަމްޕް ދެމުންދާ ކަމަށެވެ.
ސްޓޭއިންމައިއާ ވިދާޅުވީ އެމެރިކާގެ އަމަލުތައް ބަލައިނުގަނެވޭނެ ކަމަށެވެ.
”މި ދުނިޔޭގެ ނިޒާމު ބިނާކުރުމުގައި އެހީތެރިވި އަޅުގަނޑުމެންގެ އެންމެ މުހިންމު ބައިވެރިޔާ އެމެރިކާއިން ވަނީ ގަވައިދުތަކާ ހިލާފުވެފައި،“ އިއްޔެ ރޭ ދަންވަރު ބޭއްވި މަހާސިންތާގައި ވާހަކަފުޅު ދައްކަވަމުން ސްޓޭއިންމައިއާ ވިދާޅުވިއެވެ.
”މި ދުނިޔެ ފޭރޭ މީހުންގެ ރަސްކަމަކަށް ބަދަލުވުމުގެ ކުރިން އެކަން ހުއްޓުވަން ޖެހޭ. އެ މީހުން ބޭނުންހާ އެއްޗެއް ނެގުމުގެ ކުރިން އެކަން ހުއްޓުވަން ޖެހޭ. ސަރަހައްދުތައް ނުވަތަ މުޅި ގައުމުތަކަކީ މަދު ބޮޑެތި ބާރުތަކެއްގެ މުދަލެއްގެ ގޮތުގައި ބަލުމުގެ ކުރިން އެކަން ހުއްޓުވަން ޖެހޭ“
އެމެރިކާ އާއި ވެނެޒުއޭލާއާ ދެމެދު ނުތަނަވަސްކަން ބޮޑުވީ ވެނެޒުއޭލާގައި މަސްތުވާތަކެތީގެ ވިޔަފާރިއާ ގުޅުން ހުރި ތަންތަނަށް އަމާޒުކޮށް ހަމަލާތައް ދޭނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދިނުމާ ގުޅިގެންނެވެ. ވެނެޒުއޭލާގެ ޑްރަގް ބޯޓުތަކެއް ބަނދަރު ކުރާ ސަރަހައްދަކަށް ހަމަލާ ދީފައިވާނެ ކަމަށް މިދިޔަ ހަފްތާގައި ޓްރަމްޕް ވަނީ ބުނެފައެވެ. މިއީ ވެނެޒުއޭލާގެ ބާރު ހިނގާ ސަރަހައްދަކަށް އެމެރިކާ އިން ހަމަލާ ދިން ފުރަތަމަ ފަހަރެވެ.
އެމެރިކާގެ ރައީސް ޓްރަމްޕް ގެންދަނީ ވެނެޒުއޭލާގެ ޑްރަގް ކާޓަލްތަކަށް އަމާޒުކޮށް ވަރުގަދަ ހަމަލާތަކެއް ދޭން ކަމުގެ އިންޒާރު އަބަދުވެސް ދެމުންނެވެ. އެއްވެސް ހެއްކެއް ނުދައްކައި ޓްރަމްޕް ތުހުމަތު ކުރެއްވި ގޮތުގައި ވެނެޒުއޭލާގެ ރައީސް ނިކޮލަސް މަޑޫރޯ އާއި ޑްރަގް ޓްރެފިކް ކުރާ ބަޔަކާ ގާތް ގުޅުމެއް އޮވެއެވެ. މަޑޫރޯ އަދި އެ މީހުން މަސައްކަތް ކުރަނީ އެމެރިކާއަށް މަސްތުވާތަކެތި އެތެރެކޮށް، އެ ގައުމު ހަލާކުކުރަން ކަމަށް ޓްރަމްޕް ތުހުމަތު ކުރެއެވެ.