ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ފައިސާއަށް ހިޔާނާތްތެރިވެ، އެ ފައިސާ ލޯންޑާކުރި މައްސަލާގައި އެފްއޭއެމްގެ ކުރީގެ ރައީސް ބައްސާމް އަދީލް ޖަލީލް އިތުރު 23 އަހަރަށް ޖަލަށްލާން ހުކުމްކޮށްފިއެވެ.
މިއަދު އިއްވި ހުކުމާއެކު މިހާރު ބައްސާމްގެ މައްޗަށް އެވަނީ ޖުމްލަ 32 އަހަރުގެ ޖަލު ހުކުމެއް އިއްވިފައެވެ،
ހިޔާނާތާއި މަނީ ލޯންޑްރިންގެ ކުށުގައި މީގެކުރިން ބައްސާމަށް އިއްވީ ނުވަ އަހަރުގެ ޖަލު ހުކުމެކެވެ.
މިފަހަރު ބައްސާމަށް ހުކުމް ކުރީ އެފްއޭއެމަށް ފީފާއިން ފޮނުވި 1.2 މިލިއަން ޑޮލަރަށް އޭނާ ހިޔާނާތްތެރިވެފައިވާތީއެވެ.
ކޮވިޑް-19 ރިލީފް ލޯނެއްގެ ގޮތުގައި ލިބުނު އެ ފައިސާ ބައްސާމް ބޭނުން ކޮށްފައިވަނީ އަމިން އެވެނިއުގެ ދެ ޕެންޓްހައުސެއް ގަތުމަށެވެ. އެކަންކުރީ ޑޮލަރު މާރުކުރަން ކަމަށް ބުނެ އެފްއޭއެމްއިން ފައިސާ ނެރުމަށްފަހު އެ ފައިސާ އެޕާޓްމެންޓް ގަތުމަށް އަމިން ކުންފުންޏަށް ދީގެންނެވެ.
އެ މައްސަލާގައި ބައްސާމްގެ މައްޗަށް ހިޔާނާތުގެ ދައުވާ އާއި މަނީ ލޯންޑްރިންގެ ދައުވާ ކުރިއިރު, އަމިން ކުންފުނީގެ މައްޗަށް މަނީ ލޯންޑްރިންގެ ދައުވާ ކުރިއެވެ. ނަމަވެސް ކްރިމިނަލް ކޯޓުން މިއަދު ނިންމީ އަމިން ކޮންސްޓްރަކްޝަންގެ މައްޗަށް އެ ކުށް ސާބިތުނުވާ ކަމަށެވެ.
ބައްސާމްގެ މައްޗަށް މިއަދު ހިޔާނާތުގެ ކުށުގައި އަށް އަހަރުގެ ޖަލު ހުކުމެއް އިއްވިއިރު, މަނީ ލޯންޑްރިންގެ ކުށުގައި 15 އަހަރުގެ ޖަލު ހުކުމެއް ވެސް އިއްވި އެވެ. އަދި ލޯންޑާކުރި ފައިސާގެ އަދަދު ފަސް ގުނަ އަދަދު ކަމަށްވާ 44.7 މިލިއަން ރުފިޔާއިން އޭނާ ޖޫރިމަނާ ކުރަން ކޯޓުން ހުކުމް ވަނީ ހުކުމްކޮށްފައެވެ.
މީގެ އިތުރުން އެފްއޭއެމްއިން ނެރުނު 1.2 މިލިއަން ޑޮލަރަކީ އެފްއޭއެމްއަށް ލިބެން ޖެހޭ ފައިސާއެއް ކަމަށް ކަނޑައަޅައި، އެ ފައިސާ ހަ މަސް ދުވަހުގެ ތެރޭގައި ސިވިލް ކޯޓަށް ދައްކާ ހަލާސްކުރަން ބައްސާމްގެ މައްޗަށް އަމުރުކޮށްފައިވެއެވެ.