ސްކޫލް ބަންދު ދުވަސްތަކާ ދިމާކޮށް މި ޑިސެންބަރު މަހާއި ޖެނުއަރީ މަހު ރާއްޖެއިން 7،726 މީހުން އުމްރާގެ އަޅުކަން އަދާކުރަން މައްކާއަށް ދާނެ ކަމަށް އިސްލާމީ ކަންކަމާ ބެހޭ ވުޒާރާއިން ހާމަކޮށްފިއެވެ.
އިސްލާމީ ކަންކަމާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވީ، މި ހަފްތާގައި އުމްރާވެރިން ފުރަން ފަށާނެ ކަމަށެވެ. އެންމެ ފުރަތަމަ ގްރޫޕް ވަނީ މި ޑިސެންބަރު މަހުގެ 21 ވަނަ ދުވަހު 262 އުމްރާވެރިންނާ އެކު ފުރާފައެވެ. އެންމެ ގިނަ އަދަދެއްގެ އުމްރާވެރިން ފުރާނީ މި މަހުގެ 28 ވަނަ ދުވަހު ކަމަށްވާއިރު، އެ ދުވަހު 1،049 މީހުން މައްކާއަށް ފުރުމަށް ހަމަޖެހިފައިވެއެވެ.
އެންމެ ފަހު ގްރޫޕް ފުރާނީ އަންނަ ޖެނުއަރީ މަހުގެ 9 ވަނަ ދުވަހު ކަމަށްވާއިރު، އެ ދުވަހު 298 އުމްރާވެރިން ފުރުމަށް ހަމަޖެހިފައިވެއެވެ. ރާއްޖެއިން ސްކޫލް ބަންދު ދުވަސްތަކުގައި އަބަދުވެސް ވަރަށް ގިނަ އަދަދެއްގެ މީހުން އުމްރާގެ އަޅުކަން އަދާކުރުމަށް މައްކާއަށް ދާކަން ފާހަގަކޮށްލެވެއެވެ.