ދަތުރު ކުރެއްވި ޖެޓް ވެއްޓި ލީބިއާގެ އަސްކަރީ ވެރިޔާ ޖެނެރަލް މުހައްމަދު އަލީ އަހުމަދު އަލް-ހައްދާދީ އަވަހާރަވެއްޖެ އެވެ.
މީޑިއާތަކުން ބުނީ ރޭ މި ހާދިސާ ހިނގީ ތުރުކީގެ ވެރިރަށް އަންކާރާގައި ކަމަށެވެ. ޖެނެރަލު ދަތުރު ކުރެއްވި ’ފާލްކޮން 50‘ މަރުކާގެ ބިޒްނެސް ޖެޓް ވެއްޓުނު ހާދިސާގައި އިތުރު ހަތަރު މީހަކު ވެސް މަރުވެފައިވެއެވެ.
ޖެނެރަލް ތުރުކީ އަށް ވަޑައިގަތީ އެ ގައުމާ އެކު ބޭއްވި މަތީ ފަންތީގެ ދިފާއީ ގުޅުންތަކާ ބެހޭ މަޝްވަރާ ބައްދަލުވުމަކަށެވެ.
އޭނަ ދަތުރު ކުރެއްވި ޖެޓް ވެއްޓުނު ހާދިސާއާ ގުޅިގެން ލީބިއާގެ އިންޓީރިއާ މިނިސްޓަރު އަލީ ޔެރްލިކަޔާ ސޯޝަލް މީޑިއާ ޕޯސްޓެއްގައި ވިދާޅުވީ ޖެޓް ވެއްޓުނީ ޓްރިޕޮލީ އަށް ދާން، އަންކާރާގެ އެއާޕޯޓް ފުރިތާ 42 މިނިޓް ފަހުން ސިގްނަލް ވެސް ގެއްލިފައި ވަނިކޮށް ކަމަށެވެ. އަދި ޖެޓް ވެއްޓުމުގެ ވަގުތުކޮޅެއް ކުރިން އިމަޖެންސީގައި ޖައްސަން އުޅޭކަމުގެ އިޝާރާތެއް ލިބުނު ކަމަށާއި ނަމަވެސް އޭގެ އިރުތަކެއް ފަހުން ޖެޓް ވެއްޓިފައިވާ ކަމަށް ވިދާޅުވި އެވެ.
އެ ވެއްޓިފައި ވަނީ އަންކާރާގެ ހުޅަނގު ދެކުނު ސަރަހައްދަށެވެ. އެ ސަރަހައްދުން ވަނި އޭގެ ބައިތައް ވެސް ފެނިފަ އެވެ.
މި ހާދިސާގެ ތަހުގީގު މިހާރު ވަނ ފަށައިފަ އެވެ.
އަސްކަރީ ވެރިޔާ އަވަހާރަވުމާ ގުޅިގެން ލީބިއާގެ ބޮޑުވަޒީރު އަބްދުލް ހާމިދު ދިބީބީ ވިދާޅުވީ ޖެނެރަލް އަވަހާރަވުމަކީ ގައުމަށް ލިބުނު ވަރަށް ބޮޑު ގެއްލުމެއް ކަމަށާއި ހާދިސާގައި ފުރާނަ ގެއްލުނު އެންމެންނަކީ ވެސް ގައުމީ ހިދުމަތުގައި އިހްލާސްތެރިކަމާ އެކު މަސައްކަތް ކުރެއްވި ބޭފުޅުންތަކެއް ކަމަށެވެ.
