އިޒްރޭލުގެ ސަލާމަތީ ކެބިނެޓުން ވެސްޓް ބޭންކުގައި 19 އާ އާބާދީ ގާއިމުކުރުމަށް ހުއްދަ ދީފިއެވެ. އާދީއްތަ ދުވަހު އެ ގައުމުގެ ހައްދުފަހަނަ އެޅި ވާތުފިޔައިގެ ފައިނޭންސް މިނިސްޓަރު ބުނީ މި ފިޔަވަޅަކީ ފަލަސްތީނުގެ ދައުލަތެއް ގާއިމުކުރުން ހުއްޓުވުމަށް އަމާޒުކޮށްގެން އެޅި ފިޔަވަޅެއް ކަމަށެވެ.
ފައިނޭންސް މިނިސްޓަރު ބެޒަލެލް ސްމޮޓްރިޗްގެ އޮފީހުން ނެރުނު ބަޔާނެއްގައިވާ ގޮތުން، މި ނިންމުމާއެކު ފާއިތުވި ތިން އަހަރު ތެރޭގައި ހުއްދަ ދީފައިވާ ސެޓްލްމަންޓްތަކުގެ ޖުމްލަ އަދަދު 69 އަށް އަރައެވެ.
މިއީ ބައިނަލްއަޤްވާމީ ޤާނޫނުތަކުގެ ދަށުން ޤަވާއިދާ ޚިލާފު ތަންތަން ކަމަށް ބެލެވޭ އިރު އެންމެ ފަހުގެ ހުއްދަ މި ދިނީ، ވެސްޓް ބޭންކުގައި އިޒްރޭލުން ގަވާއިދާ ޚިލާފަށް އާބާދީތައް ފުޅާކުރުން ކުރާ މަސައްކަތުގެ ދަށުން 2017 ވަނަ އަހަރުން ފެށިގެން އެންމެ މަތީ ދަރަޖައަށް އާބާދު ކުރުން އިތުރުވެފައިވާ ކަމަށް އދ. އިން ބުނިތާ މަދު ދުވަސްކޮޅެއްގެ ތެރޭގައެވެ.
ސްމޮޓްރިޗް އަކީ އާބާދީތައް ފުޅާކުރުމަށް ވަރަށް ބޮޑަށް ވަކާލާތުކުރާ ފަރާތެކެވެ. އޭނާ ވެސް ހިމެނެނީ ވެސްޓް ބޭންކުގައި އިޒްރޭލުން ޤަވާއިދާ ޚިލާފަށް ހަދާފައިވާ އާބާދީއެއްގައި ދިރިއުޅޭ މީހުންގެ ތެރޭގައެވެ.
އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް ވަނީ އިޒްރޭލުން އެ ބިމުގައި އާބާދީތައް ”އިންތިހާއަށް“ ފުޅާކުރަމުން ގެންދާތީ އެކަމާ ނުރުހުން ފާޅުކުރައްވާފައެވެ.
މި މަހުގެ ކުރީކޮޅު އޭނާ ވިދާޅުވީ ”މިކަމުގެ ސަބަބުން ހަމަނުޖެހުންތައް އިތުރުވެ، ފަލަސްތީނުގެ ރައްޔިތުންނަށް އެމީހުންގެ ބިމަށް އެނބުރި ދިއުމަށް ހުރަސްއެޅި، ފުރިހަމަ އަށް މިނިވަން، ޑިމޮކްރެޓިކް، ފަލަސްތީނުގެ ދައުލަތެއް ޤާއިމުކުރުމުގެ ފުރުސަތަށް ނުރައްކާވާނެ އެވެ.“
ޣައްޒާ ހަނގުރާމަ ފެށުނު ފަހުން ފަލަސްތީނުގެ ދައުލަތެއް ޤާއިމުކުރުމަށް ގޮވާލާ ގޮވާލުންތައް ވަނީ އިތުރުވެފައެވެ. ޔޫރަޕުގެ ބައެއް ޤައުމުތަކާއި، ކެނެޑާ އަދި އޮސްޓްރޭލިއާ އިން ވަނީ މިފަދަ ދައުލަތެއް ރަސްމީކޮށް ބަލައިގަތުމަށް މަސައްކަތް ކޮށްފައެވެ. މިކަމުގެ ސަބަބުން އިޒްރޭލުން ވަނީ އެ ޤައުމުތަކަށް ފާޑުކިޔައިފައެވެ.