ސައުދީ އަރަބިއްޔާގެ ސަހަރާއަށް ސްނޯ ފައިބަން ފަށައިފިއެވެ.
ސައުދީއަށް ސްނޯ ފައިބަމުން ދަނީ ޔުނައިޓެޑް އަރަބި އެމިރޭޓްސްއާ ގުޅޭ ބޯޑަރު ސަރަހައްދުންނެވެ. އެ މަންޒަރު ފެންނަ ވީޑިއޯތައް ސޯޝަލް މީޑިއާގައި ދަނީ ދައުރުވަމުންނެވެ.
ގިނަ ބަޔަކަށް މި މަންޒަރުތައް ހައިރާންކުރުވަނި ކަމަކަށް ވަނީވެފައެވެ. އެއީ އެ ސަރަހާތަކަކީ އާންމުކޮށް ހޫނުކަމަށް ފާހަގަކޮށްލެވޭ ސަރަހައްދަކަށް ވާތީއެވެ. ސައުދީގެ މޫސުމާ ބެހޭ އޮފިޝަލަކާއި ހަވާލާދީ އެ ގައުމުގެ ނޫހެއްގައި ރިޕޯޓްކޮށްފައިވާ ގޮތުގައި ސައުދީގެ ބައެއް ހިސާބުތަކަށް ފިނި މޫސުމުގައި ސްނޯ ވެހުމަކީ އާދަޔާ ހިލާފު ކަމެއް ނޫނެވެ. ކޮންމެ ފިނި މޫސުމެއްގައި ސައޫދީ އަރަބިއްޔާގެ އުތުރުގެ ހިސާބުތަކަށް ބައެއް ފަހަރު ސްނޯ ވެހޭ ކަމަށް އެ އޮފިޝަލު ބުނެފައިވެެއެވެ.
ނަމަވެސް މޫސުމަށް އަންނަމުންދާ ބަދަލުތަކާއެކު އެކަން ބަދަލުވަމުންދާ ކަމަށް ބުނެފައިވެއެވެ. އެގޮތުން މިފަހަރު ސައުދީއަށް ސްނޯ ފޭބީ އެހެން ނޫނީ އެކަން ނުވާ ދުވަސްވަރެއްގައި ކަމަށް ވެސް އެ އޮފިޝަލު ބުނެފައިވާ ކަމަށް ރިޕޯޓްކޮށްފައިވެއެވެ. ސައޫދީގެ އިތުރުން ގަތަރުގެ ސަހަރާ ސަރަހައްދަށް ވެސް ސްނޯ ފައިބައިފައެވެ. ސައުދީގައި ސްނޯ ފޭބި ބައެއް ސަރަހައްދުތަކުގެ ތެރޭގައި ވެރިރަށް ރިޔާދުގެ އުތުރުގެ ބައެއް ހިސާބުތައް ހިމެނެއެވެ.
އާންމުވެފައިވާ ވީޑިއޯތަކުން ފެންނަ ގޮތުގައި މަގުތަކާއި ސަހަރާގެ ފަރުބަދަތައް ވަނީ ސްނޯއިން ފުރިފައެވެ. އަދި ސްނޯގައި ކުޅުމަށް ކުޑަކުދިން ނިކުމެ އުޅޭ އުފާވެރި މަންޒަރު ވެސް ވީޑިއޯތަކުން ފެނެއެވެ.