ގައުމީ އެއާލައިން، މޯލްޑިވިއަނުން ދިވެހިރާއްޖެއާއި އޮސްޓްރޭލިއާއާއި ދެމެދު ފުރަތަމަ ފަހަރަށް ސީދާ ދަތުރުތައް ފަށަން ތައްޔާރުވެއްޖެއެވެ.
އެ ކުންފުނިން ބުނީ އޮސްޓްރޭލިއާގެ މެލްބާންއިން މާލެއާ ދެމެދު ސީދާ ދަތުރުތައް ކުރަނީ އޮސްޓްރޭލިއާގެ ލީޑިންގ ޓްރެވެލް ކުންފުންޏެއްކަމަށްވާ ’ލަގްޒަރީ އެސްކޭޕްސް‘ އާއި ގުޅިގެންކަމަށެވެ.
ދިވެހިރާއްޖެއާއި އޮސްޓްރޭލިއާއާއި ދެމެދު ދަތުރުތައް ފަށާނީ އަންނަ މެއި މަހުގެ 17 ވަނަ ދުވަހުއެވެ. މި ދަތުރުތައް ހަފްތާއަކު އެއް ފަހަރު ބޭއްވުމަށް ހަމަޖެހިފައިވާކަމަށް މޯލްޑިވިއަނުން މައުލޫމާތުދެއެވެ.
މި ހިދުމަތް ދިނުމަށް ބޭނުންކުރާނީ މޯލްޑިވިއަންގެ އެއަރބަސް A330-200 މަރުކާގެ މަތިންދާބޯޓެވެ.
މި ދަތުރުތަކުގެ ސަބަބުން އެ ކުންފުނީގެ ބައިނަލްއަގުވާމީ ނެޓްވޯކް ފުޅާވެ، އެ ގައުމުން ރާއްޖެ އަންނަ ފަތުރުވެރިންގެ އަދަދު އިތުރުވެގެންދާނެކަމަށްވެސް މޯލްޑިވިއަނުންވަނީ ބުނެފައެވެ.