އިންޑިއާއިން ޗައިނާގެ ފަންނީ މަސައްކަތްތެރިންނަށް ވިޔަފާރި ވިސާ ހޯދުމުގައި ކުރިމަތިވާ ބިއުރޯކްރެޓިކް ހުރަސްތައް ކުޑަކޮށް، ވިސާ ދޫކުރުމުގެ މުއްދަތު އަވަސްކޮށްފިއެވެ.
މި ނިންމުމަކީ އޭޝިއާގެ މި ދެ ބާރުގެ ގުޅުން ބަދަހިކުރުމަށް އަޅާފައިވާ މުހިންމު ފިޔަވަޅެކެވެ. ކުރިން ވިސާ ލިބުން ލަސްވެ، ފަންނީ މީހުން ނުލިބި ބިލިއަނުން ޑޮލަރުގެ އުފެއްދުންތަކަށް ގެއްލުންވެފައިވާކަން ދެ ސަރުކާރުގެ އޮފިޝަލުން ފާހަގަކުރައްވައެވެ. އިންޑިއާގެ ބޮޑުވަޒީރު ނަރެންދުރަ މޯދީ، އެމެރިކާއިން އިންޑިއާގެ މުދަލަށް އަޅާފައިވާ ބޮޑެތި ޓެރިފްތަކާ ގުޅިގެން، ޗައިނާއާ އެކު އޮތް ގުޅުން އަލުން އާލާކުރަމުން އަންނަ މި ދަނޑިވަޅުގައި، ނިއުދިއްލީއިން ވަނީ ބިއުރޯކްރެޓިކް ބެލުންތައް ކުޑަކޮށް، ވިސާ ދޫކުރުމުގެ މުއްދަތު މަހަކަށް ވުރެ ކުރުކޮށްފައެވެ.
2020 ވަނަ އަހަރު ހިމާލަޔާ ބޯޑަރުގައި ހަމަނުޖެހުންތައް ހިނގައި، އިންޑިއާއާއި ޗައިނާގެ ގުޅުން ގޯސްވުމާ ގުޅިގެން އިންޑިއާއިން ޗައިނާއަށް ދޫކުރާ ވިސާތަކަށް ހަރުކަށި ފިޔަވަޅު އަޅާފައިވެއެވެ. ނަމަވެސް، މިހާރު ވިސާ ދޫކުރުމުގެ މައްސަލަތައް ހައްލުވެ، ވިޔަފާރި ވިސާ ހަތަރު ހަފްތާގެ ތެރޭގައި ދޫކުރަމުންދާ ކަމަށް އޮފިޝަލަކު ވިދާޅުވިއެވެ.
މި ބަދަލުތައް އައިސްފައިވަނީ ވިސާ ހޯދުމުގައި ކުރިން ކުރިމަތިވި ދަތިތަކުގެ ސަބަބުން އިންޑިއާގެ އިލެކްޓްރޯނިކްސް ކުންފުނިތަކަށް 15 ބިލިއަން ޑޮލަރުގެ ގެއްލުން ލިބިފައިވާތީއާއި، ބޮޑުވަޒީރު މޯދީ ޗައިނާއަށް ކުރެއްވި ދަތުރުފުޅަށްފަހު ދެ ގައުމުގެ ދެމެދުގައި ސީދާ ދަތުރުތައް އަލުން ފެށިފައިވާތީއެވެ.
މީގެ އިތުރުން، އެމެރިކާއިން އިންޑިއާގެ މުދަލަށް ޓެރިފްތައް ކަނޑައަޅައި، ރަޝިއާގެ ތެޔޮ ގަތުމަށް ދަތިކުރުމުން އިންޑިއާގެ ސިޔާސަތަށް ބަދަލު އައިސް، ޗައިނާއާ އެކު ގުޅުން ރަނގަޅުކޮށް، ރަޝިއާއާ އެކު ގުޅުން ބަދަހިކުރުމުގެ އިތުރުން އެމެރިކާއާ އެކު ވިޔަފާރި އެއްބަސްވުމެއް ހާސިލްކުރުމަށް ވެސް އިންޑިއާއިން މަސައްކަތް ކުރަމުން ދެއެވެ.
މިފަދަ ބަދަލުތަކުގެ ސަބަބުން ބޭރުގެ އިންވެސްޓަރުންނަށް އިތުރު ފަސޭހަތަކެއް ލިބި، އިންޑިއާގެ އުފެއްދުންތައް އިތުރުކުރުމަށް މުހިންމު ދަނޑިވަޅެއްގައި ގުޅިގެން މަސައްކަތްކުރުމުގެ ރޫހު ފެންނަމުންދާކަން ފާހަގަކޮށް އިންޑިއަން ސެލިއުލާ އެންޑް އިލެކްޓްރޯނިކްސް އެސޯސިއޭޝަނުން ވަނީ މަރުހަބާ ކިޔާފައެވެ.