އިޒްރޭލުން ވެސްޓު ބޭންކުގެ ތިން ސެޓްލްމެންޓެއް ގައި ޔަހޫދީން ވަޒަންވެރި ކުރުވުމަށް ގާތްގަނޑަކަށް 800 ގެއެޅުމުގެ ހުއްދަދީފިއެވެ.
އިޒްރޭލުން ހިފާފައިވާ ވެސްޓު ބޭންކުގެ ތިން ސެޓްލްމެންޓެއް ގައި 764 ގެދޮރު ބިނާކުރުމަށް އެންމެ ފަހުގެ ހުއްދަ ދީފައިވާ ކަން ބުދަ ދުވަހު އިއުލާނު ކުރީ، އިޒްރޭލުގެ މާލީ ވަޒީރު ބެޒަލޭލް ސްމޮޓްރިޗް އެވެ.
ފަލަސްތީނުގެ ދައުލަތެއް އުފެއްދުމާ ދެކޮޅަށް މަސައްކަތް ކުރާ ހައްދުފަހަނަ އެޅި ވަތަނީ މީހެއްގެ ގޮތުގައި ފާހަގަ ކުރެވޭ ސްމޮޓްރިޗް ބުނީ، އޭނާ 2022 ވަނަ އަހަރުގެ ފަހުކޮޅު މަގާމާ ހަވާލުވި ފަހުން، ފަލަސްތީނުގެ މީހުން މުސްތަގުބަލުގެ ދައުލަތުގެ ބައެއްގެ ގޮތުގައި އޮންނަން ޖެހޭނެ ކަމަށް ވަކާލާތު ކުރާ ވެސްޓު ބޭންކުގެ ސަރަޙައްދުގައި، 51,370 ގެދޮރު އެޅުމުގެ ޔުނިޓަށް ސަރުކާރުގެ ހަޔަރ ޕްލޭނިންގ ކައުންސިލުން ހުއްދަ ދީފައިވާ ކަމަށެވެ.
ސްމޮޓްރިޗް ނެރުނު ބަޔާނެއްގައި ބުނީ، ”މި އިންގިލާބު ކުރިއަށް ގެންދާނަން“ ކަމަށާއި، ގެދޮރު އެޅުމުގެ ޔުނިޓުތަކަށް އެންމެ ފަހުން ދިން ހުއްދައަކީ، ”ސެޓްލްމެންޓުތައް އިތުރު ކުރުމާއި، ދިރިއުޅުމާއި ސަލާމަތާއި ކުރިއެރުން ދެމެހެއްޓުން ކަށަވަރުކުރުމުގެ ސާފުކޮށް ފެންނަން އޮތް ސްޓްރެޓީޖިކް މަސައްކަތެއްގެ ބަޔެއް…“ ކަމަށެވެ.
1967 ވަނަ އަހަރުގެ ހަނގުރާމައިގައި އިޒްރޭލުން ހިފާފައިވާ ސަރަޙައްދު ގައި ގާއިމުކޮށްފައިވާ ސެޓްލްމެންޓުތަކަކީ ގާނޫނާ ހިލާފަށް ކޮށްފައިވާ ކަމެއްގެ ގޮތުގައި ދުނިޔޭގެ ގިނަ ގައުމުތަކުން ދެކެއެވެ. އަދި އދ. ގެ ސަލާމަތީ މަޖިލީހުގެ އެތައް ގަރާރެއްގައި އިޒްރޭލުން ސެޓްލްމެންޓުގެ ހުރިހާ ހަރަކާތެއް ހުއްޓާލުމަށް ގޮވާލާފައިވެއެވެ.
އިޒްރޭލުން ބުނަނީ ސެޓްލްމެންޓުތަކަކީ އެ ގައުމުގެ ސަލާމަތަށް ވަރަށް މުހިންމު ތަންތަން ކަމަށެވެ.
އަނެއްކޮޅުން ގަވައިދާ ޚިލާފަށް ވަޒަންވެރި ކުރުވާ ޔަހޫދީންގެ ފުށުން ފަލަސްތީނުގެ މީހުންނަށް ދެވޭ ހަމަލާތައް އިތުރުވަމުންދާ ކަމުގެ އެތައް ރިޕޯޓުތަކެއް ވަނީ ކޮށްފައެވެ. އދ. ގެ ރިޕޯޓެއްގައިވާ ގޮތުން، 2006 ވަނަ އަހަރުން ފެށިގެން މިފަދަ ހާދިސާތައް ރެކޯޑު ކުރަން ފެށިފަހުން، ވެސްޓު ބޭންކު ގައި ފަލަސްތީނުގެ މީހުންނަށް މި އަހަރުގެ އޮކްޓޯބަރު މަހު އެކަނިވެސް 264 ހަމަލާ ދީފައިވާކަން ރިޕޯޓު ކުރެވިފައިވެއެވެ.