އީރާނާ ދެކޮޅަށް ކުރަމުންދާ ހަނގުރާމަ ނިމުމަކަށް ގެނައުމަށް އެމެރިކާގެ ހައުސް އޮފް ރެޕްރެޒެންޓޭޓިވްސް އިން ބުދަ ދުވަހު ފާސްކޮށްފިއެވެ.
މިއީ ރައީސް ޑޮނަލްޑް ޓްރަމްޕް މި ހަނގުރާމަ ކުރިއަށްގެންދާ ގޮތަށާއި އޭގެ ސަބަބުން ކުރިމަތިވަމުންދާ އިގްތިސާދީ ނޭދެވޭ އަސަރުތަކާ މެދު ކޮންގްރެސް އިން ދިން ވަރުގަދަ ރައްދެކެވެ.
ހަނގުރާމައިގެ ބާރުތަކާ ބެހޭ ގަރާރު (War Powers Resolution) ފާސްކުރީ 215 ވޯޓުންނެވެ. މި ގަރާރާ ދެކޮޅަށް 208 މެންބަރުން ވޯޓު ދެއްވިއިރު، ޓްރަމްޕް ނިސްބަތްވެވާ ރިޕަބްލިކަން ޕާޓީގެ ހަތަރު މެންބަރަކު ވަނީ ޑިމޮކްރެޓުންނާ ގުޅިވަޑައިގެން މި ގަރާރަށް ތާއީދު ކުރައްވާފައެވެ. މި ގަރާރަށް ތާއީދު ކުރެއްވި ރިޕަބްލިކަން މެންބަރުންގެ ތެރޭގައި ބްރަޔަން ފިޓްޒްޕެޓްރިކް، ޓޮމް ބެރެޓް، ވޮރެން ޑޭވިޑްސަން އަދި ތޯމަސް މާސީ ހިމެނެއެވެ.
މި ވޯޓާ ގުޅިގެން ހައުސްގެ ރައީސް މައިކް ޖޯންސަން ވަނީ ރައީސް ޓްރަމްޕްގެ ނިންމުން ދިފާއު ކުރައްވާފައެވެ. ނަމަވެސް، ރިޕަބްލިކަން މެންބަރު ފިޓްޒްޕެޓްރިކް ވިދާޅުވީ ގާނޫނަށް ބޯލަނބަން ޖެހޭނެ ކަމަށާއި، ހަނގުރާމައިގެ ބާރުތަކާ ބެހޭ ގާނޫނުގެ ދަށުން ކަނޑައަޅާފައިވާ 60 ދުވަހުގެ މުއްދަތު މިހާރު ހަމަވެފައިވާ ކަމަށެވެ.
މި ނިންމުމަކީ ބޮޑު ތާރީޚީ ނިންމުމެއް ނަމަވެސް، މިއީ ރަމްޒީ ނިންމުމެއްގެ ގޮތުގައި ބެލެވެއެވެ. ސަބަބަކީ ރިޕަބްލިކަން ޕާޓީގެ އަޣުލަބިއްޔަތު އޮންނަ ސެނެޓުން މި ގަރާރު ފާސްވުމުގެ ފުރުސަތު ކުޑަވުމާއި، ފާސްވި ނަމަވެސް ރައީސް ޓްރަމްޕް މި ގަރާރު ވީޓޯ ކުރައްވާނެ ކަމަށް ބެލެވޭތީއެވެ. ޓްރަމްޕްގެ ސަރުކާރުން ވަނީ ހަނގުރާމައިގެ ބާރުތަކާ ބެހޭ ގާނޫނުގެ ދުސްތޫރީ ސައްހަކަމާ މެދު ސުވާލު އުފައްދާފައެވެ.
މި ހަނގުރާމަ ފެށުނީ މިއަހަރުގެ ފެބްރުއަރީ 28 ވަނަ ދުވަހު އެމެރިކާ އާއި އިސްރާއީލް ސިފައިން އީރާނަށް ދިން ހަމަލާތަކާ ގުޅިގެންނެވެ. ހަނގުރާމައަށް 90 އަށްވުރެ ގިނަ ދުވަސް ވެފައިވާއިރު، ހަނގުރާމަ ހުއްޓާލުމުގެ މަޝްވަރާތަކަށް އެދެވޭ ކުރިއެރުމެއް ލިބިފައެއް ނުވެއެވެ. މި ވޯޓު ނެގުމުގެ ކުޑަވަގުތުކޮޅެއް ކުރިންވެސް އީރާނާއި އެމެރިކާއިން ވަނީ ޕާޝިއަން ގަލްފްގައި ހަމަލާތައް ބަދަލުކޮށްފައެވެ.
މީގެ އިތުރުން، ޔޫކްރެއިނަށް އެހީތެރިކަން ފޯރުކޮށްދިނުމާ ގުޅޭ ގޮތުން ނެގުނު ވޯޓެއްގައިވެސް ރިޕަބްލިކަން ޕާޓީގެ ހަ މެންބަރަކު ވަނީ ޑިމޮކްރެޓުންނާ ގުޅިވަޑައިގެންފައެވެ. ހައުސް ފޮރިން އެފެއާޒް ކޮމިޓީގެ އެންމެ އިސް ޑިމޮކްރެޓް މެންބަރު ގްރެގަރީ މީކްސް ވިދާޅުވީ ޔޫކްރެއިނުން އެމީހުންގެ މިނިވަންކަމަށްޓަކައި ކުރާ މަސައްކަތުގައި އެމެރިކާއިން އެހީތެރިވާންޖެހޭނެ ކަމަށެވެ.