ޔޫއެފްއާ ޗެމްޕިއަންސް ލީގުގައި ރޭގައި ކުޅެވުނު މެޗުތަކަށްފަހު ބާލެސޯނާ، ބެޔާން މިޔުނިކް، ޕީއެސްޖީ އަދި އިންޓަމިލާނުން ކުއާޓާ ފައިނަލްގެ ޖާގަތައް ކަށަވަރުކުރިއިރު، މިމުބާރާތުގެ ޗެމްޕިއަންކަން ހޯދަން ނުކުތް ލިވަޕޫލް ކަޓައިފިއެވެ.
ލިވަޕޫލް މުބާރާތުން ކަޓާފައިވަނީ އަމިއްލަ ދަނޑުގައި ފްރާންސްގެ ޕީއެސްޖީއާއި ދެކޮޅަށް ކުޅެ ހިތި ގޮތަކަށް ބަލިވެގެންނެވެ.
ފްރާންސްގައި ކުޅެވުނު ފުރަތަމަ މެޗުގައި 1-0 ގެ ނަތީޖާއަކުން ކުރި ހޯދިނަމަވަސް، ދެވަނަ ލެގުގެ ފުރަތަމަ ހާފުގެ ކުރީކޮޅު އުސްމާން ދެމްބެލޭގެ ކާމިޔާބުކޮށްދިން ގޯލުން ޖުމްލަ ނަތީޖާ އެއްވަރުވިއެވެ.
ދެ ލެގުގައިވެސް މޮޅު ކުޅުމެއް ދެއްވި ޕީއެސްޖީގެ އާއި ދެކޮޅަށް ލިވަޕޫލުން އިތުރު ގޯލެއް ކާމިޔާބު ނުކުރެވުމުގެ ނަތީޖާއަކަށްވީ މި މެޗު ޕެނަލްޓީ ޝޫޓް އައުޓަކަށް ދާންޖެހުމެވެ. ޕެނަލްޓީ ޝޫޓްއައުޓްގައި ޕީއެސްޖީގެ ގޯލްކީޕަރު ޖިއަންލުއިޖީ ޑޮނަރުއްމާ ލިވަޕޫލްގެ ޑާވިން ނުނޭޒް އަދި ކަރޓިސް ޖޯންސްގެ ޕެނަލްޓީ މަތަކުރުމަށްފަހު މެޗުގެ ހީރޯއަކަށް ވިއެވެ. ޕެނެލްޓީގައި ފުރަތަމަ ލެގުގައި މޮޅުކުޅުމެއް ދެއްކި ލިވަޕޫލްގެ އެލިސަން އަށް މާބޮޑު ކަމެއް ކުރެވޭގޮތް ވަނީ ނުވެފައެވެ.
އާރނެ ސްލޮޓްގެ ޓީމަކީ ޗެމްޕިއަންސް ލީގުގެ ގުރޫޕް ސްޓޭޖުގައި އެއްވަނާގައި އޮތް ޓީމެކެވެ. އަދި މިވަގުތު އެޓީމު އޮތީ ޕްރިމިއަރ ލީގުގައި 15 ޕޮއިންޓްގެ ލީޑަކާއިއެކު އެއްވަނާގައެވެ. މިއީ ލިވަރޕޫލްއާއި އެ ޓީމުގެ ޑަޗް ކޯޗަށް މި މޫސުމުގައި ދިމާވި އެންމެ ބޮޑު ގޮންޖެހުމަށް ވާނެއެވެ.
އާދިއްތަ ދުވަހު ވެމްބްލީގައި ނިއުކާސަލް ޔުނައިޓެޑްއާ ދެކޮޅަށް ކުޅޭ ކަރަބާއޯ ކަޕް ފައިނަލްގައި ލިވަޕޫލުން ކުޅޭނެއެވެ. މި މެޗު ލިވަޕޫލަށް ވަރަށް ފަސޭހަވާނެ ކަމަށް ބެލެވެއެވެ. އަދި އެޓީމުން މި ސީޒަން ދެ ތަށްޓާއިއެކު ނިންމާލަން ފުރުސަތު ލިބޭއިރު، މީވެސް ކާމިޔާބީއެކެވެ.
ޕީއެސްޖީގައި މެސީ، އެމްބާޕޭ އަދި ނޭމާރުގެ ”ބްލިންގް ބްލިންގް“ ޒަމާން މިހާރު ވަނީ މާޒީވެފައެވެ. އޭގެ ބަދަލުގައި މިހާރު އޮތީ ޒުވާން، އެއްބައިވަންތަ ޓީމެކެވެ. އެމީހުން ކުރިމަތިލާ ކޮންމެ ފަރާތަކަށްވެސް ބޮޑު ނުރައްކަލަކަށް ވާނެކަށް އެޓީމުން ރޭގައި ވަނީ ދައްކުވައިދީފައެވެ.
ޖަރުމަނުގެ ވަރުގަދަ ބެޔާން މިޔުނިކުން ވަނީ އަނެއްކާވެސް ބެޔާން ލެވެކޫސަން ބަލިކޮށް އުއާޓާ ފައިނަލްގެ ޖާގަ ހޯދާފައެވެ. ރޭގައި ކުޅުމެޗުގައި 2-0 އިން މޮޅުވެ ޖުމްލަ ނަތީޖާ 5-0 އިން އެޓީމު ކާމިޔާބުކުރިއެވެ. މި މެޗުގައިވެސް ސްޓްރައިކަރ ހެރީ ކޭން ވަނީ މުހިންމު ދައުރެއް އަދާކޮށްފައެވެ. އޭނާ ވަނީ 52 ވަނަ މިނެޓުގައި ފުރަތަމަ ލަނޑު ޖަހައި، 71 ވަނަ މިނެޓުގައި އަލްފޮންސޯ ޑޭވިސްއަށް ދެވަނަ ލަނޑު ޖެހުމަށް އެހީތެރިވެދީފައެވެ. ކޭންގެ މި ލަނޑަކީ މި މުބާރާތުގައި އޭނާ ޖެހި 10 ވަނަ ލަނޑެވެ. މިއީ އެއް ޔޫރަޕިއަން ކަޕް ސީޒަނެއްގައި ޑަބަލް ފިގަރސްއަށް ވާސިލުވި ފުރަތަމަ އިނގިރޭސި ކުޅުންތެރިޔާއެވެ. ބެޔަންގެ މެނޭޖަރ ވިންސެންޓް ކޮމްޕަނީ ވަނީ ކޭންގެ ކުރިއެރުން ފާހަގަކޮށް، ”ހެރީ ވަނީ އުމުރުން ދުވަސްވުމާއެކު މޮޅުވެފައެވެ. އޭނާގެ މަސައްކަތުގެ އަޚްލާޤާއި އެއްގޮތްކަމަކީ މިސާލެކެވެ،“ މިހެން ބުނެފައެވެ.
ބާސެލޯނާ ވަނީ ބެންފިކާއާ ދެކޮޅަށް 3-1 އިން މޮޅުވެ، ޖުމްލަ 4-1 އިން ކުއާޓަރ ފައިނަލްގެ ޖާގަ ހޯދާފައެވެ. މި މެޗުގައި ފާހަގަކޮށްލެވުނީ 17 އަހަރުގެ ލަމީނެ ޔަމާލްގެ ހުނަރެވެ. އޭނާ ވަނީ ޗެމްޕިއަންސް ލީގު މެޗެއްގައި ލަނޑު ޖަހައި އެސިސްޓް ދިން އެންމެ ހަގު އުމުރުގެ ކުޅުންތެރިޔާގެ ގޮތުގައި ރެކޯޑު ހަދާފައެވެ. ޔަމާލް ވަނީ ފުރަތަމަ ލަނޑު ޖަހައި، އޭގެ ފަހުން ރަފީންހާ ވަނީ ދެ ލަނޑު ޖަހާފައެވެ.
އިންޓަރ މިލާން ވަނީ ފެއެނޫޑްއާ ދެކޮޅަށް 2-1 އިން މޮޅުވެ، ޖުމްލަ 4-1 އިން ކުރިއަށް ގޮސްފައެވެ. މެނޭޖަރ ސިމޯނެ އިންޒާގީ ވަނީ ކުރިއަށް އޮތް ބަޔަން މިއުނިކްއާ ދެކޮޅަށް ކުޅޭ މެޗަށް ފޯރިގަދަވާނެކަމަށް ބުނެ، ކުރީގެ ބައްދަލުވުންތަކާމެދު ވިސްނައި، އެ ޓީމުގެ ފުރުޞަތުތަކާމެދު އުއްމީދު ފާޅުކޮށްފައެވެ.
ކުއާޓަރ ފައިނަލްގެ މެޗުތަކުގައި ޔޫރަޕްގެ އެންމެ މޮޅު ކްލަބްތައް ޗެމްޕިއަންސް ލީގުގެ ޓްރޮފީއަށް ވާދަކުރާއިރު، ފޯރިގަދަ ފުޓްބޯޅަ މެޗުތަކެއް ފެންނާނެކަމުގެ ޔަޤީންކަން އެބައޮތެވެ.