މަޝްހޫރު ދިވެހި ފިލްމު ޑިރެކްޓަރު އަހުމަދު ނިމާލަށް ސްޓްރޯކެއް ޖެހިގެން އައިސީޔޫގައި ފަރުވާދޭން ފަށައިފިއެވެ.
ޑޮކްޓަރާ ހަވާލާދީ ނިމާލްގެ އާއިލާ އިން ބުނީ، އޭނާއަށް ފަރުވާދޭން ފެށީ ރޭގެ ވަގުތެއްގައި ކަމަށެވެ. އޭނާގެ ހާލު ވަރަށް ސީރިއަސް ކަމަށް އާއިލާ އިން ބުންޏެވެ.
އުމުރުން 62 އަހަރުގެ ނިމާލަށް ސްޓްރޯކެއް ޖެހުނީ މާލޭގައި ސައިކަލު ދުއްވާފައި ދަނިކޮށެވެ. ސްޓްރޯކް ޖެހުމާއެކު ސައިކަލު މަޑުކުރި ވަގުތު ބިންމައްޗަށް ވެއްޓުނެވެ.
ނިމާލް ފިލްމީ ދާއިރާއަށް ނުކުތީ 1984 ވަނަ އަހަރު އެވެ. އޭނާ ފިލްމީ ދާއިރާއަށް ނުކުމެފައިވަނީ އީސާ ޝަރީފްގެ ”ނުފޫޒު“ ފިލްމުންނެވެ.
އޭގެ ފަހުން، 1993 ވަނަ އަހަރުގެ ތެރޭގައި ނިމާލް ލިޔެ، ޑައިރެކްޓުކޮށް އަދި އެކްޓުކުރި ”ސިޓީ“އަކީ ވަރަށް މަގްބޫލުކަން ހޯދި ފިލްމެކެވެ.