ރާއްޖެއިން ބޭސް ލިބުމުގައި ހުރި ދަތިތަކަށް ހައްލު ލިބެމުން އަންނަ ކަމަށްލްތު މިނިސްޓަރު އަބްދުﷲ ނާޒިމް އިބްރާހީމް ރޭ ވިދާޅުވެއްޖެ އެވެ.
އެސްއެސްޓީވީގެ ޕްރޮގްރާމެއްގައި ނާޒިމް ވިދާޅުވީ ބޭސްތައް ލިބުން އުނދަގޫވެފައިވާ މައްސަލަ ހައްލު ކުރަން ސަރުކާރުން މަސައްކަތްތަކެއް ކުރަމުން އައިސް ކޮންމެވެސް ވަރެއްގެ ލުޔެއް މިހާރު ލިބިފައިވާ ކަމަށެވެ.
މިނިސްޓަރު ވިދާޅުވީ އާސަންދައިގެ ތެެރެއިން ބޭސް ދޫކުރުމުގެ ކަންކަން ރިފޯމްކުރި ފަހުން ބޭހުގެ އަގަށް އައި ބަދަލާ ގުޅިގެން ދިމާވި މައްސަލަތައް ހައްލުކުރަން މުހިންމު މަސައްކަތްތަކެއް ކުރަމުން އަންނަ ކަމަށެވެ. އެގޮތުން އެސްޓީއޯ އިން ބޭސް ގެންނަ މިންވަރު އިތުރުކޮށްފައިވާ ކަމަށް ނާޒިމް ވިދާޅުވިއެވެ.
”ކުރިން އެސްޓީއޯ އިން ގެންނަ ބޭހުގެ ބްރޭންޑުތަކުގެ ނޫނީ ޖެނެރިކް އެތައް ސަތޭކަ ވައްތަރެއް މިހާރު އިތުރު ކުރެވި އެސްޓީއޯގެ ސަޕްލައި އަޅުގަނޑުމެން ވަރަށް ބޮޑަށް އިތުރު ކޮށްފިން. އޭގެ ސަބަބުން ކުރިން އޮތް ދަތި ހާލަށް ވުރެ ރަނގަޅު ހާލަތަކަށް އާދެވިއްޖެ ކަމަށް އަޅުގަނޑުމެންނަށް ގަބޫލު ކުރެވޭ،“ ނާޒިމް ވިދާޅުވި އެވެ.
ނާޒިމް ވިދާޅުވީ، މިހާރު ކުރަމުން އަންނަ ކަމަކީ ފަރުވާދިނުމުގެ ގައިޑްލައިނެއް އެކުލަވާލައި އެ އަށް އަމަލުކުރަން ފެށުން ކަމަށެވެ. އޭރުން ކޮންމެ ޑޮކްޓަރަކު ކޮންމެ ބޭހެއް ލިޔެދިނުމުގެ ބަދަލުގައި ”ޖެނެރިކް ނިޒާމް“ ގެ ތެރެއަށް ފައްތާނެ ކަމަށް މިނިސްޓަރު ވިދާޅުވި އެވެ.
ރާއްޖެއަށް ބޭސް އެތެރެކުރުމަށް ސަރުކާރުން ވަނީ ސްޓޭޓް ފާމަސޫޓިކަލް އެންޑް މެޑިކަލް ސަޕްލައިގެ ނަމުގައި މިދިޔަ ސެޕްޓެމްބަރު 9 ގައި ހާއްސަ ކުންފުންޏެއް އުފައްދައިފަ އެވެ.
މިނިސްޓަރު ވިދާޅުވީ، އެ ކުންފުނި މިހާރު ހިނގައިގަންނަން ފަށާފައިވާ ކަަމަށާއި ރަނގަޅަށް މަސައްކަތް ކުރަން ފެށުމުން އަދި މާ ބޮޑުތަނުން ކަންކަން ރަނގަޅު ކުރެވޭނެ ކަމަށެވެ.