ހުޅުމާލޭގެ ތިންވަނަ ފިޔަވަހިން ގާތްގަނޑަކަށް 75 ޕަސެންޓު ހިއްކައި ނިމިފައިވާ ކަމަށް މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)އިން ބުނެފިއެވެ.
އެމްޑީޕީ ސަރުކާރުގައި 2023 ވަނަ އަހަރުގެ ސެޕްޓެމްބަރު މަހު ފުރަތަމަ ފެށި އެ މަޝްރޫއުގެ ދަށުން އޭރު ވަނީ 24 ހެކްޓަރުގެ ބިން ހިއްކާފައެވެ.
ނަމަވެސް ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެން މަސައްކަތުގެ ދުވެލި ހަލުވިކުރުމުގެ ނަތީޖާއެއްގެ ގޮތުން މިވަގުތާ ހަމައަށް ތިންވަނަ ފިޔަވަހިން 47 ހެކްޓަރުގެ ބިން ވަނީ ހިއްކިފައެވެ. އެއީ 74.6 ޕަސެންޓު ކަމަށް އެމްއޭސީއެލް އިން ބުންޏެވެ.
ކުރިއަށް އޮތް ތިން މަހުގެ ތެރޭ ގިރާވަރު ފަޅާއި ހުޅުމާލެ ތިންވަނަ ފިޔަވަހި ހިއްކައި ނިމޭނެ ކަމަށް ރައީސް މުއިއްޒު ދާދިފަހުން ވަނީ ވިދާޅުވެފަ އެވެ.
އެ ދެ ފަޅު ހިއްކުމަށްފަހު އެ ތަންތަނުން ދޫކޮށްފައިވާ ގޯތިތައް އޭގެ ހައްގުވެރީންނާ ހަވާލުކުރުމަކީ ރައީސް މުއިއްޒުގެ ރިޔާސީ ވައުދެކެވެ.
ބިން ހިއްކުމުގެ މަސައްކަތް މަޑުޖެހުނީ، ހުޅުމާލޭގެ މާސްޓާޕްލޭން މުރާޖައާކުރުމުގެ މަސައްކަތް ކުރިއަށް ދިޔުމުންކަމަށް ކުރިން ކޮންސްޓްރަކްޝަން މިނިސްޓްރީން ބުނެފައިވެއެވެ. @iyaadh_mv އަޙްމަދު އިޔާދު