ކުރީގެ ރައީސް މުހައްމަދު ނަޝީދާއި ކުރީގެ ރައީސް އިބްރާހީމް މުހައްމަދު ސޯލިހު މިއަދު ބައްދަލުކުރައްވައި ދެ ބޭފުޅުން އެއްގަލަކަށް އަރައިފިކަން އިއުލާންކުރައްވައިފިއެވެ.
ނަޝީދާއި ސޯލިހު ބޭއްވެވި ބައްދަލުވުން އޮތީ އެމްޑީޕީގެ އޮފީހުގައެވެ.
އެ ބައްދަލުވުމަށްފަހު ދެ ބޭފުޅުން ވަނީ ނޫސްވެރިންގެ ބައްދަލުވުމެއް ބާއްވާފައެވެ.
ނޫސްވެރިންނާ ވާހަކަފުޅުދައްކަވަމުން ދެ ބޭފުޅުން ވެސް ވިދާޅުވީ ދެން އެ ޕާޓީ ބައިބައިވެގެންނުދާނެ ކަމަށެވެ. ނަމަވެސް ރިޔާސީ އިންތިހާބުގައި ދެން ވާނީ ކިހިނެތްތޯ ސުވާލުކުރުމުން ދެ ބޭފުޅުން ވެސް ވަނީ އެ ވާހަކަދައްކަވަން ދެކޮޅު ހައްދަވާފައެވެ.
އެ ދެ ބޭފުޅުން ވިދާޅުވީ މިއަދުގެ ބައްދަލުވުމުގައި ރިޔާސީ އިންތިހާބާ ގުޅޭގޮތުން ވާހަކަ ނުދެކެވޭ ކަމަށާއި އެ ވާހަކަ ދައްކާނީ ފަހުން ކަމަށެވެ.
އެމްޑީޕީގެ ފޫވެއްޓިފައިވާ ކަމަށް ވިދާޅުވެ، ނަޝީދު ވަނީ އެމްޑީޕީން ވަކިވެވަޑައިގެން ޑިމޮކްރެޓްސްގެ ނަމުގައި އާ ސިޔާސީ ޕާޓީއެއް އުފައްދަވާފައެވެ. އެ ޕާޓީގެ ޖަލްސާއެއްގައި ވާހަކަފުޅުދައްކަވަމުން ނަޝީދު ވިދާޅުވެފައި ވަނީ އެމްޑީޕީ ރޫޅާލާނެ ކަމަށެވެ.
ނަމަވެސް ރިޔާސީ އިންތިހާބުގައި ޑިމޮކްރެޓްސް އިން ނެރުނު އިލްޔާސް ލަބީބަށް ލިބިފައި ވަނީ އެންމެ 15000 ވޯޓެވެ. ރިޔާސީ އިންތިހާބަށްފަހު ނަޝީދު ވަނީ އަލުން އެމްޑީޕީއާ ގުޅިވަޑައިގެންފައެވެ.