ޖެނުއަރީ މަހުގެ ނިޔަލަށް ތިލަފުށީގައި ބީއެމްއެލްގެ އޭޓީއެމް ބަހައްޓާ ޚިދުމަތް ފެށޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ކުދި އަދި މެދު ފަންތީގެ ވިޔަފާރިވެރީންނާއެކު ރޭ ސޯޝަލް ސެންޓަރުގައި ބޭއްވި ބައްދަލްވުމުގައި ތިލަފުށީގައި ވިޔަފާރި ކުރާ ބައެއް ވިޔަފާރިވެރީން ވަނީ އެ ރަށުގައި އޭޓީއެމް ޚިދުމަތް ނުލިބޭތީ ކަންބޮޑުވުން ފާޅުކޮށްފަ އެވެ.
ރޭގެ ބައްދަލްވުމުގައި ރައީސް މުއިއްޒު ވަނީ ތިލަފުށީގައި އޭޓީއެމްގެ ޚިދުމަތް ލިބޭނެ އިންތިޒާމު ހަމަޖައްސަވާނެ ކަމުގެ ޔަގީންކަން ބީއެމްއެލް އިން ދީފައިވާ ކަމަށް ވިދާޅުވެފައެވެ.
އެމަނިކުފާނު ވިދާޅުވީ ޖެނުއަރީ މަސް ނިމޭއިރު ތިލަފުށީގައި އޭޓީއެމްގެ ހިދުމަތް ބީއެމްއެލް އިން ދޭނެ ކަމަށެވެ.
މުޅި ރާއްޖެއަށް ބެންކުގެ ޚިދުމަތް ފުޅާކޮށް މީހުން ދިރިއުޅޭ ހުރިހާ ރަށެއްގައި މިހާރު ވަނީ އޭޓީއެމްގެ ޚިދުމަތް ގާއިމްކޮށްފައެވެ.
އަދި 70 ވުރެ ގިނަ ރަށުގައި ޑޮލަރު އޭޓީއެމް ބެހެއްޓުމުގެ މަސައްކަތް ދަނީ ކުރަމުންނެވެ.