ސަރުކާރުގެ މަސްކުންފުނި މިފްކޯ އިން ފުވައްމުލަކުގައި ހަދާފައިވާ ފިޝް ޕްރޮސެސިން ފެސިލިޓީ ނުވަތަ މަސް ފެކްޓަރީ އަންނަ ހަފުތާގައި ހުޅުވަން ނިންމައިފިއެވެ.
މިފްކޯ އިން ނެރުނު ނޫސްބަޔާނެއްގައި ބުނީ އެ ކުންފުނިން ފުވައްމުލަކުގައި ހެދި މަސް ފެކްޓަރީގެ މަސައްކަތް ނިންމައި ހިދުމަތް ފަށަން މިހާރު ތައްޔާރުވެފައިވާ ކަމަށެވެ.
ފުވައްމުލަކުގައި އައިސް ޕްލާންޓެއް ހެދުމުގެ މަސައްކަތް 2019 ގައި ފަށައި، އެތަނާ ޖެހިގެން މަސް ފެކްޓަރީއެއް ހެދުމުގެ މަސައްކަތް އަމިއްލަ ފަރާތަކުން 2021 ވަނަ އަހަރު ފެށި ނަމަވެސް، އެ މަސައްކަތް ހުއްޓިފައި ގިނަ ދުވަސްތަކެއް ވަންދެން ހުއްޓެވެ.
ފުވައްމުލަކު މަސް ފެކްޓްރީގެ މަސައްކަތް މުޅިން ނިމި، ސިއްހީ ގޮތުން އެންމެ ރައްކާތެރި މިންގަނޑުގައި ހިދުމަތް ގާއިމްކޮށްފައިވާ ފެސިލިޓީއެއް ކަމަށް، މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ވަނީ ނިންމާފައެވެ. އަދި ފެކްޓަރީ ހިންގަން މިހާރު ހުއްދަ ވަނީ ދީފައި ކަމަށް މިފްކޯ އިން ބުންޏެވެ.
އަންނަ ހަފްތާއިން ފެށިގެން އެ ފެކްޓަރީން މަސް ގަނެ، ޕްރޮސެސް ކުރުމުގެ މަސައްކަތް ފަށާނެ ކަމަށް މިފްކޯ އިން ބުންޏެވެ.
ރާއްޖޭގެ އެކި ކަންކޮޅުތަކުގައި މިފްކޯގެ ޚިދުމަތް ފުޅާކުރަން އެ ކުންފުނިން އަންނަނީ މަސައްކަތް ކުރަމުންނެވެ.