އަންނަ އަހަރުން ފެށިގެން ނަފުސާނީ ބަލިތަކުގެ ހުރިހާ ޚަރަދެއް އާސަންދައިން ހަމަޖައްސާނެ ކަމަށް ރައީސް ޑރ. މުޙައްމަދު މުއިއްޒު މިރޭ ވިދާޅުވެއްޖެއެވެ.
ސަރުކާރަށް ދެ އަހަރު ފުރުން ފާހަގަކުރުމަށް ބޭއްވި ރަސްމިއްޔާތުގައި ރައީސް ވިދާޅުވީ، ނަފުސާނީ ބައްޔަކީ ބޮޑު މައްސަލައަކަށް ވާއިރު، އެ ފަރުވާއަށް މިއަދާ ހަމައަށް އާސަންދައިން ޚަރަދު ހަމަނުޖެހޭ ކަމަށެވެ.
ސަރުކާރުން ވަނީ، ނަފުސާނީ ބަލީގެ މީހުންނަށް އެހީތެރިކަން ފޯރުކޮށްދިނުމަށް މިދިޔަ އަހަރު ހެލްޕްލައިނެއް ވެސް ގާއިމްކޮށްފައެވެ. 1677 އަށް ގުޅައިގެން ނަފްސާނީ ބަލީގެ މީހުންނަށް ސަރުކާރުން މިހާރު ވެސް އަންނަނީ ގިނަ އެހީތަކެއް ފޯރުކޮށްދެމުންނެވެ.
އެ ހޮޓްލައިންގެ ޚިދުމަތް ފެށި ދުވަހުން ފެށިގެން، މިދިޔަ އޭޕްރީލް މަހުގެ 22ގެ ނިޔަލަށް 5،364 މީހުން ޚިދުމަތް ހޯދާފައިވެއެވެ.
މީގެއިތުރުން ނަފުސާނީ ބަލީގައި އަމިއްލައަށް މަރުވާ މީހުން މަދުކުރުމަށް އިސްކަންދޭ ސްޓެރެޓެޖީއެއް މިދިޔަ އޮކްޓޫބަރު ވަނީ އިފުތިތާހުކޮށްފައެވެ.