ދުނިޔޭގެ ކާބޯތަކެތީގެ ދާއިރާގައި ބާއްވާ އެންމެ ބޮޑު އެއް ހަރަކާތް ކަމަށްވާ ވޯލްޑްޝެފްސް ކޮންގްރެސް އެންޑް އެކްސްޕޯ 2026 ގައި ވިޒިޓް މޯލްޑިވްސް (އެމްއެމްޕީއާރުސީ) އިން ބައިވެރިވެއްޖެއެވެ.
ޔުނައިޓެޑް ކިންގްޑަމްގެ ނިއުޕޯޓްގައި ހުންނަ އިންޓަނޭޝަނަލް ކޮންވެންޝަން ސެންޓަރު ވޭލްސްގައި މި ހަރަކާތް ކުރިއަށްދާނީ 2026 ވަނަ އަހަރުގެ މެއި މަހުގެ 16 އިން 19 އަށެވެ.
މި ބައިނަލްއަގުވާމީ މަންސައިގައި ރާއްޖޭގެ މުއްސަނދި ކާބޯތަކެތީގެ ސަގާފަތާއި، ތަފާތު ރަހަތައް ދުނިޔޭގެ އެކި ކަންކޮޅުތަކުން އަންނަ ބީޓޫބީ (B2B) އަދި ބީޓޫސީ (B2C) ސްޓޭކްހޯލްޑަރުންނަށް ދަނީ ދައްކާލަމުންނެވެ. މީގެ ސަބަބުން ދުނިޔޭގެ މުހިންމު މާކެޓްތަކުގައި ރާއްޖޭގެ މަގުބޫލުކަން އިތުރަށް ވަރުގަދަވެގެންދާނެ ކަމަށް ވިޒިޓް މޯލްޑިވްސްއިން ބުނެއެވެ.
ވޯލްޑްޝެފްސް ކޮންގްރެސް އެންޑް އެކްސްޕޯއަކީ ދުނިޔޭގެ އެންމެ މޮޅު ޝެފުންނާއި، ކަލިނަރީ ދާއިރާގެ މުދައްރިސުންނާއި، ހޮސްޕިޓާލިޓީ ދާއިރާގެ އިސް ފަރާތްތައް އެއްތަނަކުން ބައްދަލުވާ މުހިންމު ހަރަކާތެކެވެ. 2026 ވަނަ އަހަރުގެ އެޑިޝަންގައި މަތީ ފަންތީގެ މުބާރާތްތަކާއި، ތަޖުރިބާކާރުންގެ މަޝްވަރާތަކުގެ އިތުރުން ނެޓްވޯކިންގް ފުރުސަތުތައް ހިމެނެއެވެ. މިއީ ގައުމުތަކުގެ މެދުގައި ގުޅުން ބަދަހިކުރުމަށާއި، އާ ވިޔަފާރީގެ ފުރުސަތުތައް ހޯދުމަށް ލިބޭ ރަނގަޅު މާހައުލެކެވެ.
މި ހަރަކާތުގައި ބައިވެރިވުމުގެ މައިގަނޑު މަގްސަދަކީ ރާއްޖެއަކީ ކާބޯތަކެތީގެ ދާއިރާއިން ފާހަގަކޮށްލެވޭ މަންޒިލެއްގެ ގޮތުގައި އިޝްތިހާރު ކުރުމެވެ. ރާއްޖޭގެ ރަށްތަކުގެ ގުދުރަތީ މުއްސަނދިކަމާ ގުޅިފައިވާ ސަގާފީ ކެއުންތަކާއި، ރިސޯޓްތަކުން ލިބެން ހުންނަ ދުނިޔޭގެ ފެންވަރުގެ މަތީ ފަންތީގެ ކެއުންތައް މި އެކްސްޕޯގައި ދަނީ ދައްކާލަމުންނެވެ. މީގެ ސަބަބުން ރާއްޖޭގެ ފަތުރުވެރިކަމަކީ ހަމައެކަނި ރީތި ގޮނޑުދޮށްތަކެއް ނޫންކަމާއި، މިއީ ތަފާތު ތަޖުރިބާތައް ލިބޭ މަންޒިލެއްކަން ކަށަވަރުކޮށްދެއެވެ.
މި ހަރަކާތަކީ ބައިނަލްއަގުވާމީ ކަލިނަރީ ޖަމިއްޔާތަކާއި، މަޝްހޫރު ޝެފުންނާއި، ހޮސްޕިޓާލިޓީ ދާއިރާގެ މުހިންމު ފަރާތްތަކާއެކު އޮންނަ ގުޅުން ބަދަހިކުރުމަށް ވިޒިޓް މޯލްޑިވްސްއަށް ލިބޭ ސްޓްރެޓީޖިކް ފުރުސަތެކެވެ. މީގެ އިތުރުން، ދާއިރާގެ މީޑިއާތަކާއި ފަންނީ ފަރާތްތަކާ ބައްދަލުކޮށް، ދުނިޔޭގެ މަގުބޫލު މަޖައްލާތަކުގައި ރާއްޖެއަށް ލިބޭ ސަމާލުކަން އިތުރުކުރުމަށްވެސް މި ހަރަކާތުން މަގުފަހިވެގެންދާނެއެވެ.