ރ. އަތޮޅުގައި އޮތް އެންމެ އާބާދީ ބޮޑު ރަށް ކަމަށްވާ ދުވާފަރުގައި ބީއެމްއެލްގެ ޑޮލަރު އޭޓީއެމްއެއް ބެހެއްޓުމުގެ މަސައްކަތް ފަށައިފިއެވެ.
ފޭސްބުކުގައި ކުރެއްވި ޕޯސްޓެއްގައި ރައްޔިތުންގެ މަޖިލީހުގެ ދުވާފަރު ދާއިރާގެ މެންބަރު މުހައްމަދު އަލީ ވިދާޅުވީ ބީއެމްއެލްގެ ޑޮލަރު އޭޓީއެމް އެރަށުގައި ބެހެއްޓުމުގެ އަމަލީ މަސައްކަތްތައް މިއަދު ފަށާފައިވާ ކަމަށެވެ. އަދި ލަސްތަކެއްނުވެ އެ އޭޓީއެމްގެ ހިދުމަތް ދުވާފަރު ރައްޔިތުންނަށް ލިބޭނެ ކަމަށް ވެސް މެންބަރު ވިދާޅުވިއެވެ.
ދުވާފަރު ރައްޔިތުން ޒަމާނުއްސުރެ ބޭންކުގެ ޚިދުމަތް ހޯދަން ދާންޖެހެނީ އެހެން ރަށްރަށަށެވެ. ނަމަވެސް ބޭންކުގެ ހިދުމަތް ހޯދަން އެރަށު ރައްޔިތުން އެހެން ރަށްރަށަށް ދަތުރުކުރުން ނިމުމަކަށް ގެނެސްދިނީ މި ސަރުކާރުންނެވެ.
މި ސަރުކާރުން ވަނީ ދުވާފަރުގައި ބީއެމްއެލް އިސްލާމިކްގެ ބްރާންޗެއް ގާއިމްކޮށްފައެވެ. އަދި އެމްއައިބީގެ ހިދުމަތް ވެސް އެ ރަށުގައި ފެށީ ރައީސް ޑރ. މުހައްމަދު މުއިއްޒުގެ ވެރިކަމުގައެވެ.
”ދުވާފަރު ރައްޔިތުން ތިބީ ނިކަން އުފަލުން. ޝުކުރިއްޔާ ރައީސް މުއިއްޒު،“ މެންބަރު މުހައްމަދު އަލީ ވިދާޅުވިއެވެ.
އޭނާ ވިދާޅުވީ ރައީސް މުއިއްޒުގެ ދައުރު ނިމޭއިރު، މިހާތަނަށް ނާންނަވަރުގެ ތަރައްގީއެއް ދުވާފަރަށް އަންނާނެ ކަމަށެވެ.