ކުޅުދުއްފުށި ސިޓީގައި އެޅުމަސް ނިންމާފައިވާ 2،000 ހައުސިން ޔުނިޓުގެ މަސައްކަތް މިއަހަރު ފަށާނެކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.
ލޯކަލް ކައުންސިލް އިންތިހާބު އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބަށް ކުޅުދުއްފުށިން ވާދަކުރާ ޕީއެންސީ ކެންޑިޑޭޓުންގެ ކެމްޕޭން އިފްތިތާހުކުރުމުގެ ޖަލްސާގައި ވާހަކަދައްކަވަމުން މުއްތަލިބު ވިދާޅުވީ، އެޗްޑީސީއާ ހަވާލުކޮށްފައިވާ މި 2،000 ހައުސިން ޔުނިޓްގެ މަސައްކަތްކޮށްދޭނެ ބަޔަކު ހޯދުމުގެ މަސައްކަތްކުރަމުންދާ ކަމަށެވެ.
”އަޅުގަނޑުމެންނަށް ވަރަށް ބޮޑު ޔަގީންކަމެއް އެބައޮތް މިއަހަރުގެ ތެރޭގައި އޭގެ މަސައްކަތްވެސް ފަށައި އަދި މި ޔުނިޓުތައް ދޭންޖެހޭ ފަރާތްތައް ހޯދުމަށްޓަކައި އިއުލާންކުރުމުގެ މަސައްކަތް މިއަހަރުގެ ތެރޭގައި ކުރިއަށް ގެންދެވޭނެކަމަށް،“ މުއްތަލިބު ވިދާޅުވި އެވެ.
މުއްތަލިބު ވިދާޅުވީ ކުރީ ސަރުކާރުން ކުޅުދުއްފުށީގައި ހައުސިން މަޝްރޫއުގެ މަސައްކަތް ފަށާފައިވަނީ 2022 ވަނަ އަހަރުގެ ޖުލައިމަހުގެ ތެރޭގައި ކަމަށާއި ކުރީ ސަރުކާރުން އެ މަޝްރޫއުގެ މަސައްކަތް ހަވާލުކޮށްފައިވަނީ އެމްޑީޕީގެ ކުރީގެ މަޖިލިސް މެންބަރެއްގެ ކުންފުންޏަކާ ކަމަށެވެ.
އެ ކުންފުންޏަށް އެޑްވާންސް ފައިސާގެ ގޮތުގައި 65 މިލިއަން ރުފިޔާ، އޭރުގެ ސަރުކާރުން ދީފައިވާ ކަމަށާއި އަދި 21 މިލިއަން ރުފިޔާ މަޝްރޫއުގެ މަސައްކަތް ހިނގަމުން ދަނިކޮށް ދޫކޮށްފައިވާއިރު އެމްޑީޕީގެ ވެރިކަން ނިމިގެންދިޔައިރު މަޝްރޫއުގެ ނިމިފައިވަނީ 18 ޕަސަންޓް މަސައްކަތްކަމަށް މުއްތަލިބު ވިދާޅުވި އެވެ.
ސަރުކާރުން އެ ކުންފުންޏަށް ޖުމްލަ 86 މިލިއަން ރުފިޔާ ދީފައިވާތީ، މި ސަރުކާރުން މަސައްކަތް ކޮށްފައިވަނީ އަލުން އެ ކުންފުންޏާ ވާހަކަދައްކައިގެން މަޝްރޫއުގެ މަސައްކަތް ފެށޭތޯކަމަށް މުއްތަލިބު ވިދާޅުވި އެވެ. ނަމަވެސް އެ ކުންފުނިން އެއްބަސްނުވުމުން، މިދިޔަ އަހަރުގެ މެދު ތެރޭގައި އެއްބަސްވުން ބާތިލުކޮށް، މިދިޔަ އަހަރުގެ ތެރޭގައި އެޗްޑީސީއާ އެ މަޝްރޫއުގެ މަސައްކަތް ހަވާލުކޮށްފައިވާނެ ކަމަށް މިނިސްޓަރު ވިދާޅުވި އެވެ.