ރައީސް ޑރ. މުހައްމަދު މުއިއްޒު ވައުދުވިގޮތަށް، އެކަނިވެރި މައިންނާއި ބަފައިންނަށް ދެމުން ގެންދާ މާލީ އެހީ، މަހަކު 15,000 ރުފިޔާއާ ހަމައަށް ބޮޑުކޮށްފިއެވެ.
އެކަނި ދަރިން ބަލަހައްޓާ މައިން ނުވަތަ ބަފައިންނަށް މާލީ އެހީ ދިނުމާ ބެހޭ ގަވާއިދަށް ސަރުކާރުން ވަނީ އިސްލާހެއް ގެނެސްފައެވެ.
މީގެކުރިން އެކަނި ދަރިން ބަލަހައްޓާ ފަރާތްތަކަށް، ކޮންމެ ކުއްޖަކަށް ދެމުން އައީ 1,000 ރުފިޔާގެ އިނާޔަތެކެވެ. އެގޮތުން އެންމެ ގިނަވެގެން ލިބެމުން ދިޔަ އަދަދަކީ 10,000 ރުފިޔާއެވެ. ނަމަވެސް، މިއަދު ގެނެވުނު އާ ބަދަލާއެކު، އެކަނި ދަރިން ބަލަހައްޓާ މައިންނާއި ބަފައިންނަށް، ހަތަރު ކުދިންނާ ހަމައަށް ކޮންމެ ކުއްޖަކަށް 3,000 ރުފިޔާގެ މާލީ އެހީއެއް ލިބޭނެއެވެ. މިކަމުގެ ސަބަބުން، މިސާލަކަށް ހަތަރު ކުދިން ތިބޭ ފަރާތްތަކަށް މަހަކު 12,000 ރުފިޔާ ލިބިގެންދާނެއެވެ.
ހަތަރު ކުދިންނަށްވުރެ އިތުރަށް ކުދިން ތިބޭނަމަ، އިތުރުވާ ކޮންމެ ކުއްޖަކަށް މަހަކު 1,000 ރުފިޔާގެ އިތުރު އެހީއެއް ލިބިގެންދާނެއެވެ. މިގޮތަށް ދެވޭ އެލަވަންސްގެ އެންމެ މަތީ އަދަދަކަށް ހަމަޖައްސާފައިވަނީ މަހަކު 15,000 ރުފިޔާއެވެ. މާނައަކީ، އެކަނި ދަރިން ބަލަހައްޓާ ފަރާތްތަކަށް ކޮންމެ އަހަރަކު ޖުމްލަ 180,000 ރުފިޔާ ލިބިގެންދާނެއެވެ.
އެކަނިވެރި މައިންނާއި ބަފައިންގެ ގޮތުގައި 5000 އަށްވުރެ ގިނަ މީހުން ރާއްޖޭގައި އެބަތިއްބެވެ.