ސުނާމީގައި ވީރާނާވެފައިވާ ރ. ކަނދޮޅުދޫގައި ކޯލްޑް ސްޓޯރޭޖަކާ އެކު ފާނަ ޕްރޮސެސް ކުރާ ފެސިލިޓީއަކާއި މަސް ކިރާ ބަނދަރެއް ތަރައްގީކުރުމުގެ މަސައްކަތުގެ އެއްބަސްވުމުގައި މިރޭ ސޮއިކޮށްފިއެވެ.
ކަނދޮޅުދޫ ރައްޔިތުން ހިޖުރަކުރި ދުވާފަރުގައި މި އަހަރުގެ މަސްވެރިންގެ ދުވަސް ފާހަގަކުރަން މިރޭ ބޭއްވި ރަސްމީ ޖަލްސާގައި ވަނީ އެކަމާ ގުޅޭ އެއްބަސްވުމުގައި ސޮއިކޮށްފައެވެ.
އެ އެއްބަސްވުމުގައި ސޮއިކުރެއްވީ ފިޝަރީޒް މިނިސްޓަރު އަހުމަދު ޝިޔާމާއި މަސައްކަތުގެ ކޮންޓްރެކްޓަރު ތްރީ ވޭ އެންޓަޕްރައިޒަސްގެ ފަރާތުން މެނޭޖިން ޑިރެކްޓަރު ހަސަން އިބްރާހީމެވެ.
މި މަޝްރޫއާ ގުޅޭ އިތުރު ތަފްސީލު އަދި ހާމައެއްނުކުރެއެވެ.
މިއީ ދުވާފަރާއި ރ. އަތޮޅުގެ ރައްޔިތުންނަށް ލިބުނު ވަރަށް ބޮޑު އުފަލެކެވެ.
ރައީސް ޑރ. މުހައްމަދު މުއިއްޒު މިއަދު ވަނީ އެސްޓީއޯ ރޭޓްގައި ދުވާފަރުން މަސްވެރިންނަށް ތެޔޮ ލިބޭ، އެފްއެސްއެމްގެ ޕެޓްރޯލް ޝެޑް ހުޅުއްވައިދެއްވާފައެވެ.