ބަލްގޭރިއާގައި ކުރަމުން އަންނަ މުޒާހަރާތަކާއި ގުޅިގެން އެގައުމުގެ ސަރުކާރު އިސްތިއުފާ ދީފިއެވެ.
ބަލްގޭރިއާގައި މުޒާހަރާތައް ފެށިފައިވަނީ އެގައުމުގެ އިގްތިސާދީ ސިޔާސަތުތަކާ ދެކޮޅަށާއި ކޮރަޕްޝަން ނައްތާލުމަށް ފެއިލް ވެފައިވާތީ މިދިޔަ ނޮވެމްބަރު މަހުގެ 26 ވަނަ ދުވަހުއެވެ. މި މުޒާހަރާ ފެންމަތިވެފައިވަނީ 2026 ވަނަ އަހަރުގެ ބަޖެޓު ޑްރާފްޓްގައި ވިޔަފާރިތަކާއި އަމިއްލަ ފަރާތްތަކަށް ޓެކްސް ބޮޑުކުރުމުންނެވެ.
މުޒާހަރާތަކާއި ގުޅިގެން އެގައުމުގެ ބޮޑުވަޒީރު، ރޮސެން ޒެލިއަޒްކޯވް ވަނީ އޭނާއާއި އޭނާގެ ކެބިނެޓުން އިސްތިއުފާ ދީފައިވާކަން ހާމަކޮށްފައެވެ.
”އަޅުގަނޑުމެންގެ ކޯލިޝަނުން ބައްދަލުވެ، މިހާރު އޮތް ހާލަތާއި އަޅުގަނޑުމެންނަށް ކުރިމަތިވެފައިވާ ގޮންޖެހުންތަކާއި ޒިންމާދާރު ކަމާއި އެކީ ނިންމަން ޖެހޭ ނިންމުންތަކާއި ބެހޭ ގޮތުން ވަނީ މަޝްވަރާކޮށްފަ.“ އިސްތިއުފާ ދެއްވަން ނިންމި ނިންމުން އިއުލާނު ކުރަމުން އޭނާ ވިދާޅުވިއެވެ.
އޭނާ ވިދާޅުވި ގޮތުގައި އެމީހުންގެ އަމާޒަކީ މުޖުތަމައުގެ އުންމީދުތައް ހާސިލު ކުރުމެވެ.
ސަރުކާރާއި ދެކޮޅަށް ގިނަ ބަޔަކު މުޒާހަރާ ކުރަމުން އަންނައިރު، އެގައުމުގެ ވެރިރަށް ސޯފިއާގައި އެތައް ހާސް ބަޔަކު ވަނީ މުޒާހަރާއަށް ނުކުމެފައެވެ. އެ ސިޓީގެ އިތުރުން ވެސް އެގައުމުގެ އެހެން ސިޓީތަކުގައި ގިނަ ބަޔަކު ދަނީ މުޒާހަރާ ކުރަމުންނެވެ.
މި މުޒާހަރާތަކާއި ގުޅިގެން މިދިޔަ ހަފްތާގައި ރޮސެންގެ ސަރުކާރުން ވަނީ 2026 ގެ ބަޖެޓް ޑްރާޓް އަލުން އަނބުރާ ނަގާފައެވެ.