ދުނިޔޭގެ އެންމެ ފޯރިގަދަ ފުޓުބޯޅަ މުބާރާތް، އިނގިރޭސި ޕްރިމިއާ ލީގުގެ އާ ސީޒަން މިރޭ ފަށާނެއެވެ.
އާ ސީޒަންގެ ފުރަތަމަ މެޗުގައި ބައްދަލު ކުރާނީ ޕްރިމިއާ ލީގުގެ އެންމެފަހުގެ ޗެމްޕިއަން ލިވަޕޫލް އާއި ބޯންމަތްއެވެ. މި މެޗު ފަށާނީ ރާއްޖެގަޑިން މިރޭ 12 ޖަހާއިރުއެވެ.
ޕްރިމިއާ ލީގުގެ ފުރަތަމަ ހަފްތާގައި 10 މެޗު ކުޅުމަށް ވަނީ ހަމަޖެހިފަ އެވެ. މީގެ ތެރެއިން ގިނަ މެޗުތައް ކުޅުމަށް ހަމަޖެހިފައި ވަނީ މާދަމާ އެވެ. އެގޮތުން މާދަމާ ފަސް މެޗު ކުޅުމަށް ހަމަޖެހިފައިވެ އެވެ.
މި ހަފްތާގައި ކުޅޭ މެޗުތަކުގެ ތެރެއިން އެންމެ ފޯރިގަދަ ވާނެ ކަމަށް ބެލެވެނީ އާދިއްތަ ދުވަހުގެރޭ މެންޗެސްޓާ ޔުނައިޓެޑާއި އާސެނަލް ބައްދަލުކުރާ މެޗެވެ. މީގެ އިތުރުން މެންޗެސްޓާ ސިޓީއިން ވޯލްވްސް އާއި ދެކޮޅަށް ނުކުންނައިރު، ޗެލްސީ ނުކުންނާނީ މި ސީޒަންގެ ކޮމިޔުނިޓީ ޝީލްޑް ކާމިޔާބުކުރި ކްރިސްޓަލް ޕެލެސްއާއި ދެކޮޅަށެވެ.
ޕްރިމިއާ ލީގުގެ އާ ސީޒަން މިރޭ ފަށާއިރު، ޓްރާންސްފާ މާކެޓުގައި ކުޅުންތެރިން ގެނައުމުގެ މަސައްކަތް ޓީމުތަކުން އަދިވެސް އަންނަނީ ކުރަމުންނެވެ. ޓްރާންސްފާ މާކެޓު ބަންދުވާނީ އަންނަ މަހުގެ އެއްވަނަ ދުވަހުއެވެ.