ޓޮޓެންހަމްގެ ކެޕްޓަން އަދި ސައުތުކޮރެއާ ފޯވާޑް ސޮން ހިއުން މިން އެމެރިކާގެ އެލްއޭ އެފްސީއަށް ސޮއިކޮށްފިއެވެ.
އެލްއޭއެފްސީއަށް ސޮއިކުރުމަށްފަހު ސޮން ބުނީ “ އެލްއޭއެފްސީއަކީ ދުނިޔޭގެ އެންމެ ފާހަގަކޮށްލެވޭ އެއް ކުޅިވަރު ސިޓީގެ ކުލަބަކަށްވެފައި މިޓީމާއި ގުޅެން ލިބުމަކީ ވަރަށް ފަޚުރުވެރިވާ ކަމެއްކަމާށާއި އަދި ލޮސް އެންޖެލިސްއަކީ ޗެންޕިއަނުންގެ މުއްސަނދި ތާރީހެއް އޮތް ސިޓީއެއް ކަމަށެވެ. އަދި މިއީ އޭނާގެ ކެރިއަރުގައި މުޅިން ތަފާތު ތަޖުރިބާއެއް ކަމަށާއި، އުންމީދަކީ މިޓީމާއެކު ކާމިޔާބު ހޯދުންކަމަށްވެސް އޭނާ ބުންޏެވެ.
އެލްއޭއެފްސީ އިން ސޮންގެ ސޮއި ހޯދާފައިވަނީ އެމެރިކާ ލީގުގެ ރެކޯޑެއް ކަމަށްވާ 20 މިލިއަން ޕައުންޑްގެ ޓްރާންސްފަރ ފީއަކަށެވެ.
ޖަރުމަނުގެ ބަޔާ ލެވަކޫސަން އިން 2015 ވަނަ އަހަރު ޓޮޓެންހަމް އާއި ގުޅުނު ސޮން ވަނީ ނިމިގެންދިޔަ ސީޒަނުގައި ޔޫރޮޕާ ލީގުގެ ޗެންޕިއަންކަން ޓޮޓެންހަމް އަށް ހޯދަދީ 17 އަހަރަށްފަހު ފުރަތަމަ ފަހަރަށް އެ ޓީމަށް މުބާރާތެއް ކާމިޔާބުކޮށްދިނުމުގައި މުހިންމު ދައުރެއް އަދާކޮށްފައެވެ.
ޓޮޓެންހަމްގައި ހޭދަކުރި 10 އަހަރުގެ ތެރޭގައި ސޮން ވަނީ އެ ކްލަބަށް 454 މެޗު ކުޅެދީ 173 ލަނޑު އެ ކުލަބަށް ކާމިޔާބުކޮށްދީފައެވެ. އަދި މީގެ އިތުރުން 22-2021 ވަނަ އަހަރުގެ ސީޒަނުގައި ސޮން ވަނީ ޕްރިމިއާ ލީގުގެ އެންމެ ގިނަ ލަނޑުޖެހި ކުޅުންތެރިއާގެ އެވޯޑް ވެސް ހޯދާފަ އެވެ.