އދ. ގެ ތިންވަނަ ކަނޑުތަކާބެހޭ ކޮންފަރެންސްގައި ރާއްޖެއިން ބައިވެރިވެއްޖެއެވެ.
މި ކޮންފަރެންސަކީ ދުނިޔޭގެ މުސްތަޤްބަލަށް ވަރަށް މުހިންމު ދަނޑިވަޅެއްގައި ބޭއްވޭ ކޮންފަރެންސެއްކަމަށް ރާއްޖޭގެ ސަރުކާރުން ވަނީ ފާހަގަކޮށްފައެވެ.
ކަނޑުތަކާއި އޭގެ ވަސީލަތްތައް ހިމާޔަތްކޮށް، ދެމެހެއްޓެނިވި ގޮތެއްގައި ބޭނުންކުރުމަކީ ރާއްޖެ ފަދަކުދި ޖަޒީރާ ޤައުމުތަކުގެ މުސްތަޤްބަލަށް ވަރަށް މުހިންމު ކަމެއް ކަމަށެވެ. އަދި ކަނޑުތަކަށް ނުރައްކާވާ ކަންކަން ނައްތާލުމަށް އަވަސް ފިޔަވަޅުތަކެއް އެޅުމަކީވެސް ކޮންމެހެން ކުރަންޖެހޭ ކަމެކެވެ.
”މި ކޮންފަރެންސްގައި ބައިވެރިވާ ހުރިހާ މަންދޫބުންނާއެކު މަސައްކަތްކޮށް، އަޅުގަނޑުމެންގެ ކަނޑުތައް ހިމާޔަތްކޮށް ރައްކާތެރިކުރުމަށް އަޅަންޖެހޭ ފިޔަވަޅުތައް އެޅުމަށް މަގުފަހިކުރެވޭނެކަމަށް އުންމީދުކުރަން،“ ވަޒީރު ޠާރިޤް ވިދާޅުވިއެވެ.
މި ކޮންފަރެންސްގައި ރާއްޖެ ތަމްސީލުކުރައްވާނީ މިނިސްޓަރ އޮފް ޓޫރިޒަމް އެންޑް އެންވަޔަރަމަންޓް އޮނަރަބަލް ޠާރިޤް އިބްރާހިމް ، މިނިސްޓަރ އޮފް ފިޝަރިޒް އެންޑް އޯޝަން ރިސޯސަސް އަޙުމަދު ޝިޔާމް އަދި ދެ މިނިސްޓްރީގެ އިސްބޭފުޅުންގެ ވަފުދެކެވެ. ކޮންފަރެންސްގައި ކަނޑުތަކުގެ ދިރުންތައް ހިމާޔަތްކުރުމާއި، މޫސުމަށް އަންނަ ބަދަލުތަކުގެ ސަބަބުން ކަނޑުތަކަށް ކުރާ އަސަރު ކުޑަކުރުމާ ގުޅޭ ގޮތުން މަޝްވަރާކުރެވޭނެ ކަމަށް ބެލެވެއެވެ.
ރާއްޖެއަކީ 99 އިންސައްތަ ކަނޑުން އެކުލެވިފައިވާ ޤައުމަކަށްވުމާއެކު، މި ކޮންފަރެންސްގެ ނަތީޖާ ރާއްޖެއަށް ވަރަށް މުހިންމުވާނެ ކަމަށް ތިމާވެށީގެ ވަޒީރު ވިދާޅުވިއެވެ. އަދި ކޮންފަރެންސްގައި ރާއްޖޭގެ އަޑު އުފުލާނެ ކަމަށާއި، ކަނޑުތައް ހިމާޔަތްކުރުމަށް ރާއްޖެއިން ކުރަމުންދާ މަސައްކަތްތައް ހިއްސާކުރާނެ ކަމަށްވެސް އެ މަނިކުފާނު ވިދާޅުވިއެވެ.