ޣައްޒާގައި އިސްރާއީލުން ހިންގަމުންދާ ޤަތުލުއާންމު ހަމަލާތައް ހުއްޓުވުމަށް ބައިނަލްއަޤްވާމީ މުޖުތަމަޢުއިން ވަގުތުން ފިޔަވަޅު އަޅަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ.
އެމަނިކުފާނު އެކްސްގައި ހިއްސާ ކުރެއްވި ޕޯސްޓެއްގައި ރައީސް ވިދާޅުވީ، ޣައްޒާގައި އިސްރާއީލުން އާންމު ރައްޔިތުންނަށް އަމާޒުކޮށް ހިންގަމުންދާ ހަމަލާތައް ވަރަށް ހަރުކަށި ގޮތެއްގައި ކުށްވެރިކުރައްވާ ކަމަށެވެ.
އަނިޔާވެރިކަން ހުއްޓުވުމަށާއި ހަނގުރާމަ ނިމުމަކަށް ގެނައުމަށް ބައިނަލްއަޤްވާމީ މުޖުތަމަޢުއިން ވަގުތުން އަދި ހަރުދަނާ ފިޔަވަޅުތަކެއް އަޅަން ރާއްޖެއިން ގޮވާލާ ކަމަށްވެސް އެމަނިކުފާނުގެ ޕޯސްޓްގައި ވިދާޅުވިއެވެ.
މީގެ އިތުރުން ރައީސް ވަނީ، ބައިނަލްއަގުވާމީ ޤާނޫނުތަކާއި އެއްގޮތަށް ޣައްޒާ ރައްޔިތުންގެ ފުރާނަ ހިމާޔަތް ކުރުމަށް ގޮވާލި ގޮވާލުން އަނެއްކާ ވެސް ތަކުރާރު ކުރައްވާފައެވެ.
ފަލަސްތީނުގެ މައްސަލައިގައި ފަލަސްތީނަށާއި، ފަލަސްތީނު ރައްޔިތުންނަށް ރާއްޖެއިން ތާއީދުކުރާކަން ކުރިންވެސް ތަކުރާރުކޮށް ރައީސް ވަނީ ވިދާޅުވެފައެވެ.
ޣައްޒާގައި ހިނގަމުންދާ ހަނގުރާމައިގައި މިހާތަނަށް އެތަކެއް ހާސް މީހުން މަރުވެފައިވާއިރު، މީގެ ތެރޭގައި ގިނަ އަދަދެއްގެ ކުޑަކުދިންނާއި އަންހެނުން ހިމެނޭކަން ފާހަގަކުރެވެއެވެ.
އިއްޔެވެސް ވެސް ނިބުރުވެރި އިސްރާއީލުން ވަނީ ޣައްޒާގެ 100 އަށްވުރެ ގިނަ ރައްޔިތުން ޝަހީދުކޮށްލާފައެވެ. އެހެންނަމަވަސް ދުނިޔެ މިކަމަށް ވަނީ ބީރު ކަންފަތެއް ދީފައެވެ. ޚާއްސަކޮށް ސުލްހައަށް ލޯބިކުރާ ކަމަށް ދައުވާކުރާ އެމެރިކާ ވަނީ ޖައްބާރު ނަތަންޔާތޫގެ ކުރިމަތީގައި ކުޑަކަކޫ ޖަހާފައެވެ.
ހުޅަނގާއި މުނާފިގުކަން ދައްކާ އިސްލާމީ ބައެއް ގައުމުތަކުގެ އެހީގައި ހައްދުފަހަނައަޅާފައިވާ އިޒްރޭލުން ހިންގާ ޖަރީމާތައް ކިތަންމެ ފުޅާކުރި ނަމަވެސް ފަލަސްތީނުގެ ހައްގުގައި ހަމައެކަނި ޖިހާދު ކުރާ ހަމާސް ޖަމާއަތް މިހާތަނަށް ބަލިކުރެވޭ ގޮތެއް ނުވެއެވެ. މިއީ ޔަހޫދީގެ ވަރަށް ބޮޑު ފޭލިއާއެކެވެ.