ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އެމަނިކުފާނުގެ އިނގިރޭސިވިލާތައް ކުރައްވަމުން ގެންދަވާ ދަތުރުފުޅުގައި، ލީޑްސްގެ ލޯޑް މޭޔަރ ކައުންސިލަރ އެބިގެއިލް މާޝަލް ކަޓަންގްއާއި ވެސްޓް ޔޯކްޝަޔަރގެ މޭޔަރ ޓްރޭސީ ބްރެބިންއާ ބައްދަލުކުރައްވައިފިއެވެ.
މި ބައްދަލުވުމުގައި، ރައީސުލްޖުމްހޫރިއްޔާ ސަރުކާރުގެ އިސްކަންދޭ ކަންތައްތަކާއި ތަރައްޤީގެ މަޝްރޫޢުތަކާ ބެހޭގޮތުން މަޢުލޫމާތު ދެއްވައި، ދިވެހިރާއްޖެއަށް ދިމާވެފައިވާ ތަރައްޤީގެ ގޮންޖެހުންތަކަށް ހައްލު ހޯދުމަށް ލީޑްސް ސިޓީއާއެކު އެކްސްޕަޓީޒްގެ ދާއިރާއިން އެއްބާރުލުން ދެވިދާނެ ދާއިރާތަކާ ބެހޭގޮތުން މަޝްވަރާކުރެއްވިއެވެ.
ރައީސް ޑރ. މުޢިއްޒު، އެމަނިކުފާނުގެ ސަރުކާރުން ޤައުމީ ފެންވަރުގައި ސަރުކާރުގެ ޚިދުމަތްތައް ޑިޖިޓަލައިޒްކުރުމަށް އިސްކަންދޭ ކަމުގައި ފާހަގަކުރެއްވިއެވެ. މީގެ އިތުރުން، ރައީސުލްޖުމްހޫރިއްޔާ މަގުތައް އަލުން ހެދުމާއެކު ދަތުރުފަތުރުގެ ނިޒާމު ރަނގަޅުކުރުމަށް ރޭވިފައިވާ ޕްލޭންތަކާ ބެހޭގޮތުން ވާހަކަފުޅު ދެއްކެވިއެވެ.
ފަތުރުވެރިކަމުގެ ދާއިރާއިން އެއްބާރުލުން ދިނުމާ ބެހޭގޮތުން ވާހަކަފުޅު ދައްކަވަމުން، ރައީސުލްޖުމްހޫރިއްޔާ ވިދާޅުވީ، އެމަނިކުފާނުގެ މި ދަތުރުފުޅަކީ ލިވަރޕޫލް ފުޓްބޯޅަ ކްލަބާއެކު އަލަށް ޤާއިމުކުރެވުނު ސްޓްރެޓެޖިކް ޕާޓްނަރޝިޕްއާ ގުޅިގެން ކުރެއްވި ދަތުރުފުޅެއް ކަމަށާއި، މިކަމުގެ ސަބަބުން ރާއްޖޭގެ ފަތުރުވެރިކަމުގެ ސިނާޢަތަށް އިތުރު ކުރިއެރުމެއް ލިބޭނެ ކަމަށް އުންމީދުކުރައްވާ ކަމުގައެވެ.
މި ބައްދަލުވުމުގައި، ލީޑްސްގެ ލޯޑް މޭޔަރާއި ބައިވެރިން، އެ ސިޓީގެ މަޝްރޫޢުތަކާ ބެހޭގޮތުން މަޢުލޫމާތު ދެއްވައި، އާންމު ދަތުރުފަތުރާއި، ކުޅިވަރުގެ ދާއިރާއިން އެއްބާރުލުން ދިނުމާއި، ޘަޤާފީ އެއްބާރުލުމާއި، މޫސުމަށް އަންނަ ބަދަލުތަކާ ގުޅޭ މާލީ އެހީތެރިކަން ފަދަ އެކި ދާއިރާތަކުން މަސައްކަތްކުރަމުންދާ ގޮތާ ބެހޭގޮތުން މަޝްވަރާކުރެއްވިއެވެ. އަދި އެފަރާތްތަކުން ދިވެހިރާއްޖޭގެ ތަރައްޤީއަށް އެއްބާރުލުން ދިނުމަށާއި ޙިއްޞާ ދިނުމަށް ޝައުޤުވެރިކަން ފާޅުކުރައްވައި، އެކަމަށް މަގުފަހިވާނެ ގޮތްތަކާ ބެހޭގޮތުން މަޝްވަރާކުރެއްވިއެވެ.
މި ބައްދަލުވުން ނިމުނީ ދެފަރާތުން ވެސް އެކުގައި ކުރިއަރައި ފާގަތިވުމަށް މަގުފަހިކޮށްދޭ ބައިވެރިކަން ކުރިއަށް ގެންދިއުމަށް އަޒުމު ކަނޑައަޅުއްވައިގެންނެވެ.