އދ.ގެ ’ކޮމިޝަން އޮން ދަ ސްޓޭޓަސް އޮފް ވިމެން‘ (ސީއެސްޑަބްލިއު)ގެ މެމްބަރަކަށް ވުމަކީ ރާއްޖެއަށް ލިބުނު ބޮޑު ފަހުރެއް ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
މިގޮތުން ސޯޝަލް މީޑިއާގައި އެމަނިކުފާނު ވަނީ މިކަމާއި ގުޅޭގޮތުން ޕޯސްޓެއް ކުރައްވާފައެވެ.
ރައީސުލްޖުމްހޫރިއްޔާ ވިދާޅުގޮތުގައި އދ. ގެ އަންހެނުންގެ ޙާލަތާބެހޭ ކޮމިޝަން (ޔޫއެން ވިމެން) ގެ މެމްބަރުކަމަށް 2026-2030 ވަނަ އަހަރުގެ ދައުރަށް ދިވެހިރާއްޖެ ހޮވިފައިވުމަކީ ވަރަށް ބޮޑު ޝަރަފެކެވެ.
މިއަދު މި ކޮމިޝަނަށް ހޮވުނު އެހެން ހުރިހާ ޤައުމުތަކަށްވެސް އެމަނިކުފާނުގެ ޕޯސްޓްގައި ވަނީ މަރުޙަބާ ދަންނަވާފައެވެ. އެކުވެރި ޕާޓްނަރޝިޕެއްގެ ތެރެއިން، އަންހެނުންގެ ޙައްޤުތަކާއި ބާރުވެރިކަމާ ގުޅޭ މުހިންމު މައްސަލަތަކުގައި ކޮމިޝަނަށް އެހީތެރިވުމަށް އަޅުގަނޑުމެން ތައްޔާރަށް ތިބިކަމަށްވެސް އެމަނިކުފާނު ވިދާޅުވިއެވެ.
ވޭތުވެދިޔަ އަހަރުތަކުގައި، ޤައުމީ އަދި ބައިނަލްއަޤްވާމީ ފެންވަރުގައި އަންހެނުންގެ ޙައްޤުތަކާއި ދަރަޖަ ކުރިއެރުވުމަށް ދިވެހިރާއްޖެއިން ވަނީ މުހިންމު ފިޔަވަޅުތަކެއް އަޅާފައެވެ. އެންމެންނަށް ހިމެނޭ މުސްތަޤްބަލެއްގެ މަޤްޞަދުގައި ކޮމިޝަންގެ މަސައްކަތްތައް ހަރުދަނާކުރުމަށްޓަކައި ހުރިހާ ބައިވެރިންނާއެކު މަސައްކަތްކުރުމަށް އަޅުގަނޑުމެން ފޮނިއުންމީދުގައި ތިބިކަންވެސް ރައީސް ފާހަގަ ކުރެއްވިއެވެ.